Toqaev Aqtoǵaı mys balqytý zaýytynyń qurylysyn bastaý rásimine qatysty

Prezıdent saltanatty rásimde sóz sóılep, Abaı oblysyndaǵy Aqtoǵaı ken ornynda salynatyn mys balqytý zaýytyn tutas el ekonomıkasynyń órkendeýine tyń serpin beretin asa mańyzdy jobanyń biri dep atady.

— Taý-ken metallýrgııasy memleketimiz úshin strategııalyq mańyzy zor sala ekeni belgili. Men byltyr halyqqa Joldaýymda osy máselege arnaıy toqtaldym, naqty mindetterdi aıqyndadym. Sondyqtan jańa zaýyttyń qurylysyn osy baǵytta istelip jatqan belsendi jumystyń nátıjesi dep aıtýǵa bolady. Barshańyzǵa málim, búginde Qazaqstan damýdyń dańǵyl jolyna túsip, tarıhı órleý dáýirine senimmen qadam basty. Biz birtutas ári jasampaz jurt bolyp asa aýqymdy reformalardy tabysty júzege asyryp jatyrmyz. Eń bastysy, jarqyn bolashaǵymyzǵa baǵdar bolatyn Konstıtýtsııamyzdy qabyldadyq. Konstıtýtsııada ultymyzdyń myzǵymas qundylyqtary men qaǵıdattary tolyq kórinis tapty. Azamattardyń ál-aýqatyn arttyrý strategııalyq mindet retinde aıqyndaldy. Osyndaı óndiristik jobalar, eń aldymen, elimizdiń ıgiligin arttyrýdy kózdeıdi, — dedi Qasym-Jomart Toqaev.

Prezıdent Qazaqstannyń kóptegen paıdaly qazbalarǵa ıe memleket retinde osy tabıǵı resýrstardy tıimdi paıdalanýǵa barlyq kúsh-jigerin salyp jatqanyna nazar aýdardy

Elimizde 9,5 myńnan astam ken orny bar. Qazaqstanda jylyna shamamen 160 mıllıon tonna ken óndiriledi. 3,5 mıllıon tonnaǵa jýyq mys kontsentraty shyǵarylady.

— Jalpy, elimizdegi óńdeý ónerkásibiniń damý qarqyny jaqsy dep aıtýǵa bolady. Byltyr óńdeý salasyndaǵy jalpy ónim kólemi 60 mıllıard dollarǵa jetti. Sońǵy úsh jylda elimizdiń barlyq aımaǵynda 540 ındýstrııalyq joba iske qosyldy. Sonyń arqasynda 50 myń turaqty jumys orny paıda boldy. Búgin de bárimiz taǵy bir óndiristiń bastalýyna kýá bolyp otyrmyz. Bul — el ekonomıkasyna serpin beretin mańyzdy oqıǵa. Jańa kásiporyn jylyna 300 myń katodty mys shyǵarady. Bul ishki naryqtyń suranysyn tolyq qamtamasyz etýge jetedi. Osy zaýyt iske qosylǵan soń Qazaqstan joǵary sapaly tazartylǵan mys óndiretin jetekshi elderdiń ondyǵyna kire alady. Budan bólek, atalǵan kásiporynda altyn jáne kúkirt qyshqyly óndirilmek. Bir sózben, bul aýqymdy joba otandyq metallýrgııa salasynyń damýyna qomaqty úles qosatyny sózsiz, — dedi Memleket basshysy.

Prezıdent kásiporyn aktsıonerleriniń aldynda óte mańyzdy mindetter turǵanyn aıtty.

— Ásirese, jumysshylardyń zańdy áleýmettik qajettilikterin qamtamasyz etý qajet. «Halyq únine qulaq asatyn memlekettiń» basty máni de — osy. Úkimet, jergilikti bılik ókilderi eńbek ujymdarymen tyǵyz baılanys ornatyp, belsendi jumys isteýi kerek. Bul jumys «Zań men tártip» tujyrymdamasyna sáıkes júrgizilýge tıis, — dedi Memleket basshysy.