Toqaev 2029 jylǵy saılaýǵa qatysa ma – Prezıdent jaýaby
ASTANA. KAZINFORM – Memleket basshysy Qasym-Jomart Toqaev Táýelsizdik saraıynda ótken brıfıngte 2029 jylǵy Prezıdent saılaýyna qatysýy nemese qatyspaýy týraly tilshiler suraǵyna jaýap berdi.
– Qasym-Jomart Kemeluly, jýyrda Konstıtýtsııalyq sot jarııalaǵan túsindirmege sáıkes, Sizdiń Memleket basshysy retinde Prezıdent laýazymyna qaıta saılanýǵa quqyǵyńyz bar eken. Bul jańalyq qoǵamdy eleń etkizdi. Siz óz quqyńyzdy paıdalanyp, 2029 jylǵy Prezıdent saılaýyna túsýdi josparlap otyrsyz ba? Prezıdent saılaýy 2029 jyly óte me, álde kezekten tys saılaý bolýy múmkin be?, – dep suraq qoıdy jýrnalıst.
Memleket basshysy saılaý ótkizýge jáne oǵan qatysatyny nemese qatyspaıtyny týraly sóz qozǵaýǵa áli erte ekenin aıtty.
– Konstıtýtsııalyq sot osyndaı sheshim qabyldady. Álbette, zań júzinde meniń qaıta saılanýǵa quqyǵym bar. Biraq aldaǵy ýaqytta saılaý ótkizýge jáne oǵan qatysatynym nemese qatyspaıtynym týraly sóz qozǵaýǵa áli erte. Biz elimizdiń aldynda turǵan aýqymdy mindetterdi eńserýimiz kerek. Tutas Qazaqstandy úlken qurylys alańyna aınaldyryp, eń aldymen, azamattarǵa arnalǵan áleýmettik nysandar salýymyz qajet, – dep jaýap berdi Prezıdent.
Prezıdent bul maqsatqa Ulttyq qordyń qarjysyn paıdalanýǵa daıyn ekenin jetkizdi.
– Halyqtyń ıgiligine jarata almasaq, qarajatty shetelderde qundy qaǵaz retinde ustap otyrýdyń qajeti qansha? Qarjyny jaı ǵana ustap otyrýǵa qarsymyn. Qarajat halqymyzdyń, azamattarymyzdyń ıgiligine qyzmet etýi kerek. Árıne, álemdegi jaǵdaıǵa basa nazar aýdarýymyz, jan-jaqty taldaýymyz qajet. Ózderińiz bilesizder, geosaıası ahýal kúrdeli. Buralań jolmen júrgenimizge qaramastan, el ishinde beıbitshilikti saqtap, damýǵa qaraı bet alyp kelemiz. Ekonomıkalyq ósim anyq baıqalady. Muny negizgi halyqaralyq qarjy ınstıtýttarynyń baǵasy da rastady. Aldaǵy ýaqytta taǵy jolyǵarmyz. Bálkim, kelesi jyly... Sol kezde sizge naqty jaýap beremin, – dedi Memleket basshysy.
Aıta keteıik, búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi.
Memleket basshysy Qasym-Jomart Toqaev Táýelsizdik saraıynda ornalasqan №520 saılaý ýchaskesinde daýys berdi.
Buǵan deıin Prezıdent «Vıtse-prezıdent kim bolady?» degen suraqqa jaýap bergen edi.
