Toqaev 2 mln aýyl turǵynynyń tabysyn kóteretin baǵdarlamaǵa bastama jasady
«Qazirgi ahýal belgili shyndyqty naqty qýattap berdi: azyq-túlik qaýipsizdigi - tolyqtaı alǵanda memleket qaýipsizdiginiń basty elementi. Sondyqtan biz sharýalarǵa barynsha qoldaý kórsetýdi jalǵastyramyz. Qazirdiń ózinde júzege asyrylyp jatqan forardtyq satyp alýlarǵa qosymsha offteık-kelisimsharttar engizý jáne «QazAgro» kredıtteri boıynsha bereshekterdi qaıta qurylymdaý joly arqyly qarjylandyrý tetigi keńeıtiledi», - dedi Memleket basshysy.
QR Prezıdentiniń dereginshe, elimizde shamamen 1 mln 700 myń jeke qosalqy sharýashylyq bar. Degenmen olardyń ónimderi saýda nysandary arqyly resmı saýdalanbaıdy jáne qaıta óńdeý kásiporyndaryna jetkizilmeıdi. Memleket olardan salyq ta almaıdy. Al mundaı sharýashylyqpen aınalysatyndar áleýmettik jaǵynan da qorǵalmaǵan.
«Úkimetke «Atameken» UKP-men birlesip, birneshe óńirdegi aýylda «alqaptan sórege deıin» kooperatsııalyq tizbekti damytý boıynsha ilki jobany iske qosýdy tapsyramyn. Keıinirek, jobany masshtabtaýǵa jáne 2021 jyldyń ortasyna qaraı tolyqqandy baǵdarlama ázirleýge bolady. Bul baǵdarlamany júzege asyrý barysynda «Damý» qorynyń kepildik berý quralyn paıdalaný arqyly «QazAgro» jelisi arqyly jyldyq mólsherlemesi 6 paıyzpen jeńildetilgen mıkrokredıtti qoldanylady», - dedi Qasym-Jomart Toqaev.
Memleket basshysynyń atap ótýinshe, turaqty satyp alý jáne satý, qatysýshylardyń agrarlyq quziretin arttyrý jáne oqytý júıesin de jolǵa qoıý qajettigin basa aıtty.
«Munyń barlyǵy shamamen 2 mln aýyl turǵynynyń tabysyn arttyryp, otandyq aýyl sharýashylyǵy kásiporyndarynyń júktemesin 53-ten 70 paıyzǵa deıin ulǵaıtady jáne áleýmettik mamńyzy bar ónimder ımportyn tómendetedi», - dedi QR Prezıdenti.