Toǵjanov qazaq tilin meńgergen ózge ult ókilderiniń sanyn jarııalady

ASTANA. QazAqparat - Búgin Astanada respýblıka boıynsha ótken «Myń bala» atty mádenı-aǵartýshylyq baıqaýdyń jeńimpazdary marapattaldy. Konkýrstyń negizgi maqsaty - ózge ult ókilderiniń balalaryn qaza tilin úırenýge yntalandyrý, memlekettik tildi biriktirýshi faktor retinde qalyptastyrý, dep xabarlaıdy QazAqparat tilshisi.

«Shyny kerek, «Myń bala» degen jobany qolǵa alǵan kezde ár túrli áńgimeler boldy. Jasaı alamyz ba, joq pa? Bir jyldyń ishinde qazaq tilin myń bala biledi degen nıetpen bastaǵan bolatynbyz. Búgin myń bala emes, eki jyldyń ishinde 585 000 bala osy jobadan ótti. Olardyń ishinde tildi jetik ári tereń meńgergen balalardyń sany 106 myńdy qurap otyr. Bul degen - úlken kúsh! Eger buǵan deıin Assambleıanyń ishinde 423 000 adam memlekettik tildi meńgeretin bolsa, olarǵa taǵy da 585 000 bala qosyldy. Bul  jaı áńgime emes. Bul - naqty memlekettik til saıasatynyń is júzinde asyp jatýyna dálel», - dedi Qazaqstan xalqy Assambleıasy tóraǵasynyń orynbasary Eraly Toǵjanov.
 

Astanadaǵy búgingi saltanatty jıynǵa «Myń balanyń» barlyǵy kelmese de, oq boıy ozyq shyqqan jeńimpazdar jınaldy. Olardyń árbireýine estelik syılyqtar tabystaldy. Balalar óz kezeginde ónerlerin ortaǵa salyp, qazaq tilinde án aıtyp, dombyramen kúı shertti, tipti terme aıtqandar da boldy. Olardyń ishinde orys, tatar, ýkraın, káris jáne taǵy basqa ult ókilderiniń balalary bar.