Toǵjanov: Bul - jalpyulttyq tutastyǵymyzdy aıshyqtaı túsetin búkilhalyqtyq tarıhı kún
Oblys ákimi Eraly Toǵjanov óńir turǵyndaryn Respýblıka kúnimen quttyqtady.
«Memleketimiz damýdyń jańa satysyna kóterilip, álemdik qaýymdastyqta laıyqty oryndy ıelendi. Memleket basshysy Qasym-Jomart Kemeluly Toqaevtyń búgingi saıası júıeni jańǵyrtý baǵytyndaǵy reformalary memleket pen qoǵamnyń baılanysyn jańa deńgeıge kóterdi. Eń alǵashqy qadam - Konstıtýtsııalyq referendým ótkizilip, Ata zańǵa tolyqtyrýlar engizildi. Eldiń birligi men bitimgerligi talqyǵa túsetin tarıhı bastama Ulttyq quryltaıda memleketimizdiń damýynyń jańa baǵyttary aıqyndaldy. Qazaqstannyń ákimshilik-aýmaqtyq bólinisinde jańa 3 oblys quryldy. Ulttyq quryltaıda qabyldanǵan eń mańyzdy sheshim 25 qazan - Respýblıka kúnine ulttyq mereke mártebesi qaıtaryldy. Memleket basshysy egemendik kúnin elimizdiń basty merekesi retinde atap ótýdi usyndy. Respýblıka kúnin merekeleý jalpyulttyq tutastyǵymyzdy, qalyptasqan memlekettiligimizdi aıshyqtaı túsetin búkilhalyqtyq tarıhı kún»,- dedi Eraly Toǵjanov.
Aımaq basshysy oblystyń damýy jolynda jasalyp jatqan jumystarǵa qysqasha toqtalyp, aldaǵy ýaqytta júzege asyrylýy tıis josparlarymen bólisti.
Saltanatty shara aıasynda birqatar aqtóbelikke óńirdiń áleýmettik-ekonomıkalyq jáne mádenı damýyna, halyq arasyndaǵy dostyq pen yntymaqtastyqty nyǵaıtýǵa qoǵamdyq qyzmette belsendilik tanytyp, úles qosqany úshin el Prezıdentiniń Jarlyǵymen memlekettik nagradalar tabystaldy.
«Parasat» ordeni arheolog, tarıh ǵylymdarynyń doktory Serik Ájiǵalıǵa jáne fılosofııa ǵylymdarynyń doktory, eńbek ardageri Altaı Taıjanovqa tabys estildi.
«Qurmet» ordenimen nagradtalǵandardyń qatarynda Baıǵanın aýdandyq aýmaqtyq saılaý komıssııasynyń tóraǵasy Qojaǵalı Aqqoja, Sh.Bersıev atyndaǵy Aqtóbe joǵary aýyl sharýashylyǵy kolledjiniń dırektory Qasymbek Aldııarov, eńbek ardageri Kóshkinbaı Ahmetov, dene múmkindigi shekteýli jandarǵa arnalǵan sport klýbynyń jattyqtyrýshysy Sergeı Vedıýshkın, oblystyq sottyń tóraǵasy Aslambek Merǵalıev bar.
ІІІ dárejeli «Eńbek Dańqy» ordeniniń ıegerleri Aqtóbe hrom qosyndylary zaýytynyń sheberi Raıl Ilıasov, «Uly qabyrǵa «QQBK» JShS sheberi Mereke Qadyralıev, Aqtóbe ferroqorytpa zaýyty tsehynyń bastyǵy Sábıt Qaıraqbaev, «Tabys» sharýa qojalyǵynyń basshysy Nurǵazy Qasymov atandy.
Eńbegimen erekshelengen birqatar aqtóbelik «Erligi úshin», «Eren eńbegi úshin», «Shapaǵat» jáne «Jomart júrek» medaldarymen, Qazaqstan Respýblıkasynyń Qurmet gramotasymen, «Oblysqa sińirgen eńbegi úshin» medalimen marapattaldy.
Úsh aqtóbelik Astanada ótken saltanatty sharaǵa arnaıy shaqyryldy. «Altyn-Ásel» JShS dırektory Hamıt Óteýuly «Otan» ordenin, «Eki Ezý» satıra teatrynyń kórkemdik jetekshisi Nurlybek Jubatqan «Eren eńbegi úshin» medalin, «Meıirim» jastardy áleýmettik beıimdeý ortalyǵynyń dırektory Janna Dúısenbına «Shapaǵat» medalin ıelendi.
