Toǵjanov Aqmolanyń Bulandy aýdanyndaǵy sý tasqyny qaýpi bar aýmaqtardy aralady
ASTANA. KAZINFORM — QR Premer-mınıstriniń keńesshisi Eraly Toǵjanov Úkimet basshysynyń tapsyrmasymen Bulandy aýdanyndaǵy ahýalmen tanysty, dep habarlaıdy Aqmola oblysynyń ákimdigi.
Eraly Toǵjanov Aqmola oblysynyń ákimi Marat Ahmetjanov jáne Tótenshe jaǵdaılar vıtse-mınıstri Ramıl Kamalovpen birge Makınsk qalasyndaǵy sý tasqyny qaýpi bar barlyq aýmaqtar aralap shyqty, jaǵdaı jiti tekserildi.
Búginde aýdanda sý tasqynynyń saldaryn joıý baǵytyndaǵy jumystar qarqyndy júrgizilip jatyr. Makınsk qalasynda qalpyna keltirý is-sharalary belsendi túrde atqarylyp jatyr. Oblystyq jedel tasqynǵa qarsy shtabtyń sheshimimen sý erkin ótýi jáne turǵyn úılerdi sý basýdan saqtaý maqsatynda oblystyq mańyzdaǵy avtojoldyń belgili bir bóligi buzylyp, sýǵa jol ashyldy. Jedel qabyldanǵan sharalardyń arqasynda sý deńgeıi bir metrge tómendedi.
Qazirgi tańda Makınsk qalasynyń 12 ýchaskesinde jumys júrip jatyr. Qutqarý sharalaryna Kókshetaý, Qaraǵandy, Astana jáne Atbasar qalalarynan kelgen TJ bólimsheleri, jergilikti atqarýshy organdar men M. Ǵabdýllın atyndaǵy azamattyq qorǵaý akademııasynyń kýrsanttary jumyldyrylǵan. Barlyǵy 319 adam, 86 tehnıka, 30 motopompa, 5 PNS jáne 2 júzý quraly tartylǵan.
— Sapar qorytyndysy boıynsha sý tasqynynyń saldaryn joıý jumystaryn jedel júrgizý, aýlalar men jeke turǵyn úılerden sýdy tolyq sorǵyzyp, baǵyttaý, sý deńgeıi túskennen keıin búlingen jol ýchaskelerin qalpyna keltirý boıynsha naqty tapsyrmalar berildi. Atalǵan másele Úkimettiń jiti baqylaýynda, — delingen habarlamada.
Osyǵan deıin Qanat Bozymbaev SQO-daǵy sý tasqynyna daıyndyq barysyn teksergenin jazdyq.