Toǵyzqumalaqtan el birinshiliginde batysqazaqstandyqtar tórt medaldiń úsheýin utyp aldy
ORAL. QazAqparat - Pavlodar qalasynda 18-22 qarasha aralyǵynda toǵyzqumalaqtyń blıts túrinen erler arasynda ótkizilgen QR jekeleı chempıonatynda batysqazaqstandyq sportshylar asa tabysty óner kórsetti, dep habarlaıdy QazAqparat.
BQO dene shynyqtyrý jáne sport basqarmasynan túsken málimetke qaraǵanda, baıraqty básekege elimizdiń 14 oblysynan toǵyzqumalaq sheberleri qatysty.
Jarys qorytyndysynda BQO quramasynan Saılan Matylov chempıon atansa, Jarashan Saǵynbaev pen Áset Qaıyrjanov qola júldeni ıelendi. Olardyń bapkeri - Dáýlet Ábdikárimov. Sóıtip jeńis tuǵyryna kóterilgen tórt sportshynyń úsheýi batysqazaqstandyq bolyp shyqty. Mundaı jetistik toǵyzqumalaq tarıhynda buryn-sońdy kezdespegen, deıdi osy sport túrin jaqsy biletinder.
Aıta keteıik, atalmysh jarysta birinshi jáne ekinshi oryndy ıelengen sportshylar aldaǵy jyly Astanada ótetin álem chempıonatyna joldama aldy.
