For Essozımna Gnassıngbeniń Qazaqstanǵa resmı saparynyń mańyzy qandaı
Memleket basshysynyń shaqyrýymen 27-28 qarashada Togo Respýblıkasynyń Prezıdenti For Essozımna Gnassıngbe Astanaǵa alǵash ret resmı saparmen keledi. Osy oraıda Qazaqstan Prezıdentiniń keńesshisi – Baspasóz hatshysy Berik Ýálıuly bul sapardyń máni men mańyzy týraly aıtty, dep habarlaıdy Kazinform.
Onyń aıtýynsha, qazirgi halyqaralyq jaǵdaıda Qazaqstan syrtqy saıası jáne ekonomıkalyq yntymaqtastyq aıasyn keńeıtýge múddeli. Osyǵan baılanysty Afrıka elderimen aradaǵy baılanystardy jandandyrý perspektıvti baǵyttardyń biri sanalady.
«Búginde bul qurlyqtyń damý jáne ekonomıkalyq ósim áleýeti zor ekenin atap ótken jón. QHR, Reseı, AQSh, Eýropa Odaǵy jáne basqa da kóptegen memleket pen aımaqtyq birlestikter osy kontınentpen yntymaqtastyqty nyǵaıtýǵa erekshe nazar aýdarady. Kelesi jyly Qazaqstan men Togo arasynda dıplomatııalyq qatynas ornaǵanyna 10 jyl tolady. Qazirgi tańda eki el BUU, IYU jáne Afrıka odaǵy sııaqty halyqaralyq uıymdar sheńberinde yqpaldastyq ornatqan. Elimiz 2013 jyldan bastap atalǵan qurlyqtyń 54 memleketin biriktiretin Afrıka Odaǵynda baqylaýshy mártebesine ıe boldy», - dedi Berik Ýálıuly.
Prezıdent keńesshi Afrıka elderi, onyń ishinde Togo Qazaqstanǵa jáne onyń ekonomıkalyq múmkindikterine zor qyzyǵýshylyq tanytyp otyrǵanyn málim etti.
«Saýda-ekonomıkalyq qatynastardy jańa deńgeıge kóterý úshin mol áleýet bar. Byltyr Qazaqstannyń Afrıka memleketterimen aradaǵy taýar aınalymy 1 mıllıard dollardan asty. Bıylǵy 9 aıdyń ishinde ózara saýda-sattyq 568 mıllıon dollarǵa jetti. Qazaqstan shıkizat jáne shıkizattyq emes taýar túrleri boıynsha atalǵan qurlyqqa eksport kólemin ulǵaıtýǵa daıyn. Taý-ken ındýstrııasy, aýyl sharýashylyǵy, kólik jáne logıstıka, týrızm, bilim berý salalaryndaǵy yntymaqtastyqty ilgeriletý úshin mol múmkindik bar», - dedi Qazaqstan Prezıdentiniń keńesshisi – Baspasóz hatshysy Berik Ýálıuly.
