Toǵyzqumalaq halyqaralyq oıyn platformalarynda tanymal bolyp kele jatyr

ASTANA. KAZINFORM — Toǵyzqumalaq álemde úzdik ıntellektýaldy oıynǵa aınalyp kele jatyr. Bul týraly Dúnıejúzilik toǵyzqumalaq federatsııasynyń prezıdenti Álıhan Báımenov «Búgin LIVE» baǵdarlamasyna bergen suhbatynda aıtty.

– Almatyda oqýshylar arasynda álem chempıonatyn ekinshi ret uıymdastyrdyq. Onyń ishinde 15 jasqa deıingi balalar bólek, 17 jasqa deıingi balalar bólek klassıkalyq, rapid, blitz túrlerinen jarysty. Oǵan 180 oıynshy qatysty. Olardyń bir bóligi onlaın, bir bóligi oflaın baq synady. Sebebi toǵyzqumalaq keńinen damýy úshin biz jańa tehnologııalardy da paıdalanýdy qolǵa alyp júrmiz, – deıdi stýdııa qonaǵy.

Federatsııa prezıdenti qazaqtyń ulttyq oıyny álemdik platformalarda úzdik atanyp jatqanyn jetkizdi.

– Toǵyzqumalaqtyń álemniń eń kóp oılanatyn zııatkerlik oıyn platformalarynda da óz orny bar. Solardyń ishinde Kanadanyń igGameCenter, Polshanyń PlayOK, Brıtanııanyń PlayStrategy degen platformalarynda toǵyzqumalaq qazir eń kóp oınalatyn oıyndardyń biri bolyp tur. Al keıingi jańalyq – osydan eki aı buryn bir jas azamat jasandy ıntellektini iske qosyp, ony toǵyzqumalaqqa úıretti. Ol osy oıyndy ádistemelik turǵyda jańa deńgeıge kóterýge múmkindik berip otyr, – deıdi ol.

Álıhan Báımenov jaqynda Almatyda ótken álem chempıonatynyń mańyzyna toqtaldy.

– Oqýshylar arasyndaǵy chempıonattyń máni zor. Árıne, eresekter arasynda olardan myqty oıynshylar bar. Biraq bizdiń bolashaǵymyz – jastar. Olar barǵan jerlerinde osy oıyndy nasıhattaıdy. Máselen, oqýshylar arasyndaǵy birinshi álem chempıonatyna Kolýmbııanyń, Ispanııanyń oıynshylary júldeger boldy. Olar barǵan kezde federatsııalar óz elderinde olardy keremet qoshemetpen qarsy aldy. Byltyr «Kóshpendiler oıyny» aıasynda 41 memleketten oıynshylar qatysqandyqtan, bul jańa serpin berip, odan beri álemniń túkpir-túkpirinde jańa federatsııalar ashylyp jatyr, - deıdi federatsııa prezıdenti.

Aıta keteıik, 19-23 qarasha aralyǵynda Almatyda toǵyzqumalaqtan jasóspirimder arasynda chempıonat ótti. Álem birinshiliginde 21 memleketten kelgen 180-ge jýyq sportshy baq synady. Baıraqty básekede otandastarymyz 30 medal jeńip alyp, jalpy komandalyq esepte top jardy.

Osyǵan deıin Qazaqstanda 210 myńnan astam adam toǵyzqumalaq oınaıtyny týraly jazdyq.