Toǵyzqumalaq ataýy ózgere me – vıtse-premer depýtat saýalyna jaýap berdi

ASTANA. KAZINFORM – Premer-Mınıstrdiń orynbasary Tamara Dúısenova Májilis depýtatynyń toǵyzqumalaq zııatkerlik oınynyń ataýyn ózgertýge qatysty saýalyna jaýap berdi.

«Álemdik tájirıbede birdeı oıyndardyń, zattardyń, qubylystardyń ár tilde ártúrli ataýlaryn kezdestirýge bolady. Mysaly, álemde fýtboldy aǵylshyndar «fýtbol», ıtalıandyqtar «kalcho», amerıkandyqtar «sokker» deıdi. Zııatkerlik oıynnyń biri shahmatty alsaq, ony bir elderde «shatran», taǵy bir elderde «chess», basqalary «shahmat» deıdi. Túrki halyqtarynda da birdeı oıyndar ár túrli ataýlarmen atalady. Mysaly, qyrǵyz halqy «asyq atýdy» - «ordo», «kúresti» - «alysh», «kókpardy» - «kók-bórý» dep ataıdy. Sonymen qatar «toǵyzqorǵool» ataýy qyrǵyz halqyna, al «mangala» aty túrik halqyna tıesili», - dep atap ótedi vıtse-premer.

Úkimet bashysynyń orynbasary halyqtyń jadynda, sondaı-aq A. Krasnov, N.Pantýsov, B.Kýftın, R.Karýtts, M.Balaqaev, Á.Aqshoraev, S.Amanjolov, S.Tileýbaev pen basqa da kóptegen ǵalymdardyń eńbekterinde jáne M.Áýezovtyń shyǵarmalarynda oıyn «toǵyzqumalaq» dep atalǵanyn alǵa tartady.

«Oǵan qosa, qazaq halqyna tıesili myńjyldyq tarıhy bar toǵyzqumalaq ataýyn ózgertý federatsııanyń da, basqa uıymdardyń da quzyretine kirmeıdi. Joǵarydaǵyny eskere otyryp, ulttyń mádenı murasy bolyp tabylatyn myńjyldyq tarıhy bar toǵyzqumalaq oıynynyń ataýyn óz qalpynda qaldyrǵandy jón dep sanaımyz», - dedi Tamara Dúısenova.