Toǵyz jastaǵy qyzylordalyq jyrshy 30 shaqty termeni jatqa biledi

QYZYLORDA. KAZINFORM – Qyzylorda oblysyndaǵy eń jas jyrshy Qarmaqshy aýdanynyń Turmaǵambet aýylynda turady. Ol – Turmaǵambet Іztileýov atyndaǵy №29 mekteptiń 4-synyp oqýshysy Aıarý Nurlybek.

Aıarýdyń qazaqtyń ulttyq aspabyna áýestigi kishkentaı kezinde-aq baıqalǵan. Qolyna túsken kez kelgen nárseni dombyra sııaqty tartyp, yńyldap júredi eken. Otbasynda kıeli óner jolyna túsken eshkim bolmasa da balanyń boıyndaǵy talantty baıqaǵan ájesi ony alty jasynda aýyldaǵy Jıenbaı jyraý úıirmesine ertip apardy. Sodan beri Aıarý dástúrli ónerdi dáriptep júr. 30-ǵa jýyq termeni jattap alǵan, ony 10 shaqty maqamda oryndaı alady.

- Maǵan Syr súleıleriniń ishindegi shoqtyǵy bıik Jıenbaı jyraýdyń «Sóıleshi, tilim, sóıleshi», Omar Shoraıaqulynyń «Jastarǵa ósıet», «Óren júırik», Naýryzbaı Aıtýarulynyń «Sóz sóıleıin termeden», Turmaǵambet Іztileýulynyń «Qaıratty týǵan er bolsań» atty jyr-dastandary qatty unaıdy. Ata-babamyz terme arqyly kúndelikti ómirde kezdesetin jaǵdaılarǵa baılanysty aqyl-keńes berip, jastarǵa ónege aıtyp, jaqsylyqty nasıhattap otyrǵan, - dedi jas jyrshy.

Ulttyq bolmys pen tarıhty ushtastyrǵan saf óner keıipkerimizge úlken atasy Rysbaıdan darysa kerek. Ol esimi Eshnııaz, Ońǵar, Turymbet jyraýlarmen qatar atalatyn Dańmuryn jyraýdyń qyzynan týǵan eken. Qanmen daryǵan ónerdi Aıarý izdenisimen, eńbegimen jalǵastyryp júr. Ol buǵan deıin talaı jyr dodasynda top jaryp úlgerdi. Úlken-kishi sahnalarda óner kórsetip, oblystyq, respýblıkalyq jáne halyqaralyq baıqaýlarda qatarynan ozyq ekenin birneshe márte dáleldedi. «Shákirtsiz ustaz tul» demekshi, onyń tuǵyr bıiginen kórinýine ustazy Dinıslam Toqsanbaevtyń sińirgen eńbegi zor.

- Aıarýdyń talabyn tanyp, bizdiń úıirmege Darash ájesi ákelgen bolatyn. Búginde ol ata-ájesiniń, áke-sheshesiniń, bárimizdiń úmitimizdi aqtady. Aıarý jyr-termelerdi birden jattap alady. Shákirtimniń bolashaǵynan úlken úmit kútemin, - dedi ustazy.

Aıarý bolashaqta óziniń kim bolatynyn aıqyndap qoıǵan. Armany — atadan balaǵa mırasqorlyq jolmen jalǵasyp kele jatqan jyrshylyq ónerdi jańǵyrtyp, jańa bıikke kóterý.

Buǵan deıin biz Túrkistan oblysy Qazyǵurt aýdanynyń Altyntóbe aýylynda eki tańbaly jáne tipti úsh tańbaly sandardy oısha esepteı alatyn jáne kóbeıtý amaldaryn aǵylshyn tilinde erkin oryndaıtyn tórt jastaǵy bala ósip kele jatqanyn jazǵan edik.