Toǵyz náreste ólimi: Reseıde perzenthana jumysyn toqtatty

ASTANA.KAZINFORM - Reseıdiń Novokýznetsk qalasyndaǵy №1 perzenthana 90 táýlikke jumysyn toqtatty. Oǵan az ýaqytta toǵyz náreste ólimi sebep boldy.

— Sot «G.P. Kýrbatov atyndaǵy №1 Novokýznetsk qalalyq klınıkalyq aýrýhanasy» memlekettik avtonomdy densaýlyq saqtaý mekemesiniń №1 akýsherlik aýrýhanasynyń jumysyn 90 kúnge deıin toqtata turý túrinde ákimshilik jaza qoldandy, - dep habarlady Kemerovo oblysy sottarynyń birlesken baspasóz ortalyǵy.

TASS agenttiginiń habarlaýynsha, osy kezeńde ǵımaratta jóndeý jumystaryn júrgizýge jáne anyqtalǵan buzýshylyqtardy túzetýge ruqsat etildi.

Rospotrebnadzor ókili buzýshylyqtardy rastady. Ákimshilik is Reseı Federatsııasynyń Ákimshilik quqyq buzýshylyq týraly kodeksiniń 6.3-babynyń 1-bóligi (halyqtyń sanıtarlyq-epıdemıologııalyq ál-aýqatyn qamtamasyz etý týraly zańnamany buzý) boıynsha qozǵaldy. Qazirgi ýaqytta sot sheshimine shaǵym túsken joq.

Esterińizge sala keteıik, Reseıdiń Novokýznetsk qalasyndaǵy perzenthanada Jańa jyl merekesi kezinde toǵyz jańa týǵan náreste kóz jumdy. Barlyq náreste 2025 jyldyń 1 jeltoqsany men 2026 jyldyń 12 qańtary aralyǵynda dúnıege kelgen.

Sábı óliminiń resmı sebebi áli jarııalanǵan joq.