Armenııada robototehnıka men jasandy ıntellekt ulttyq ortalyǵy qurylady
ASTANA. KAZINFORM — Armenııada robototehnıka men fızıkalyq jasandy ıntellektini damytýǵa arnalǵan ARPI ulttyq ortalyǵy ashylady. Joba ǵylymı zertteýlerdi damytýǵa, ınjener mamandar daıarlaýǵa jáne jańa tehnologııalardy ázirleýge baǵyttalǵan. Bul týraly Kazinform agenttiginiń óńirdegi menshikti tilshisi Armenpress basylymyna silteme jasap habarlady.
Joba Esepteý ǵylymdary men jasandy ıntellekt salasyndaǵy ozyq zertteýler agenttigi (ARCS∙ai), Armenııanyń Amerıka ýnıversıteti, Erevan memlekettik ýnıversıteti jáne Ulttyq polıtehnıkalyq ýnıversıtetiniń birlesýimen júzege asyrylady.
Ortalyq jyl saıyn fızıkalyq jasandy ıntellekt baǵyty boıynsha shamamen 50 maman daıarlaýdy josparlap otyr. Bilim berý baǵdarlamasynyń alǵashqy kezeńi bastalyp ta ketti. Oǵan Armenııanyń Amerıka ýnıversıteti men Erevan memlekettik ýnıversıtetiniń 30 stýdenti qatysyp jatyr.
Oqý baǵdarlamasy aıasynda robot mehanıkasy, basqarý júıeleri, tsıfrlyq egizder jáne basqa da baǵyttardy qamtıtyn toǵyz arnaıy kýrs ázirlengen. Al 2027 jyly Armenııanyń Amerıka ýnıversıtetinde fızıkalyq jasandy ıntellekt boıynsha magıstratýra baǵdarlamasyn ashý josparlanyp otyr.
Ortalyqtyń negizgi ǵylymı-zertteý alańy Armenııanyń Amerıka ýnıversıtetindegi robototehnıka zerthanasy bolady. Ony qurýǵa jáne qajetti jabdyqtarmen qamtamasyz etýge 500 myń AQSh dollary bólinedi dep josparlanǵan.
Zerthana robot-manıpýlıatorlarmen, mobıldi robottarmen, vırtýaldy shyndyq tehnologııalarymen jáne ushqyshsyz ushý apparattaryn synaýǵa arnalǵan júıemen jabdyqtalady. Sonymen qatar jasandy ıntellekt modelderin oqytý jáne robottardyń jumysyn modeldeý úshin NVIDIA grafıkalyq protsessorlary paıdalanylady.
Ortalyqtyń bilim berý jáne ǵylymı-zertteý jumystaryna 14 oqytýshy qatysady. Olardyń arasynda AQSh pen Eýropanyń ýnıversıtetteri men ǵylymı ortalyqtarynan shaqyrylǵan mamandar da bar.
Joba aıasynda halyqaralyq yntymaqtastyqty damytýǵa da basymdyq berilmek. ARCS∙ai Germanııanyń Agile Robots, AQSh-tyń FieldAI jáne Shveıtsarııanyń KM-RoBoTa robototehnıka kompanııalarymen, sondaı-aq Kalıfornııa tehnologııalyq ınstıtýty men ETH Zurich sııaqty sheteldik joǵary oqý oryndarymen áriptestik ornatý máselesin talqylap jatyr.
Aıta keteıik, bıyl tamyzda Armenııanyń Razdan qalasynda Firebird kompanııasynyń jasandy ıntellekt fabrıkasy resmı túrde ashylǵan bolatyn.
Aıta keteıik, Armenııa úkimetiniń 2031 jylǵa deıingi is-qımyl jospary bekitildi.