Toǵyz aıda 144 myń qazaqstandyq avtokólik óndirildi
ASTANA. KAZINFORM — Búgin Úkimet otyrysynda Ónerkásip jáne qurylys vıtse-mınıstri Qýandyq Qajkenov mashına jasaý salasynyń damý barysy jóninde málimdedi.
Onyń sózinshe, atalǵan sektor bıyl toǵyz aı ishinde 22,8%-ǵa ósim kórsetti.
— Osy salada kólik quraldaryn, aýyl sharýashylyǵy jáne temir jol tehnıkasyn, sondaı-aq turmystyq tehnıkany óndirý kólemi artty. Toǵyz aıda shamamen júz qyryq tórt myń avtokólik quraly óndirildi. Onyń ishinde júz otyz alty myńnan astamy — jeńil avtomobılder, myń segiz júzge jýyǵy — avtobýstar, bes myń segiz júzge jýyǵy — júk jáne arnaıy tehnıka, — dedi Qýandyq Qajkenov.
Mundaı ósimge ishki suranystyń artýy jáne buryn iske qosylǵan jobalardyń josparly óndiristik qýatyna jetýi áser etken.
— Salaǵa salyqtyq jáne kedendik jeńildikter de qosymsha qoldaý kórsetip keledi. Atap aıtqanda, turmystyq tehnıkany ótkizý kezinde qosylǵan qun salyǵynan bosatý sharasy kelesi jyldyń sońyna deıin qoldanylady. Osyǵan baılanysty, óndiristegi otandyq úlesti arttyrý, jáne Samsung sııaqty iri halyqaralyq kompanııalardy tartý úshin osy jeńildiktiń qoldanylý merzimin uzartý usynylady, — dedi vıtse-mınıstr.
Aıta keteıik, buǵan deıin elimizde buryn óndirilmegen jańa ónim túrleri shyǵaryla bastaǵanyn jazǵanbyz.
