«Tobylmen» teń oınaǵan «Astana» tóreliktiń ádiletsizdigine qatysty úndeý jarııalady
ASTANA. QazAqparat - Búgin fýtboldan Qazaqstan chempıondary - «Astananyń» resmı saıtynda atalmysh klýbtyń sporttyq dırektory Aleksandr Konochkınniń úndeýi jarııalandy. Konochkın óz sózinde 17-shi týrdyń ortalyq matchynda tórelik aldyn ala kesip-pishilgenin atap ótýde. Ol «Astanaǵa» qarsy sóz baılasýdyń anyq-qanyǵyn ashý úshin kúsh qurylymdary vedomstvolaryn iske qosatynyn aıtyp otyr, dep habarlaıdy QazAqparat tilshisi.
«SPORTINFORM» SAA Aleksandr Konochkınniń úndeýiniń tolyq mátinin jarııalaǵan:
5 shilde kúni Qostanaıda ótken Qazaqstan chempıonatynyń Premer-lıgasyndaǵy «Tobyl» - «Astana» arasyndaǵy matchtyń keıbir soraqy epızodtaryna jankúıerlerdiń, sport jýrnalısteri men fýtbol mamandarynyń nazaryn aýdartqym keledi.
Biz Qyzyordadan kelgen basty arbıtr Danııar Sahı men onyń kómekshileriniń bálkim ádeıi oılastyrylǵan, bizdiń oıymyzsha biliksiz, óte kúmán týdyrarlyq vıdeoúzindini daıyndap qoıdyq. Ózderińiz oıǵa salyp kórińizder:
Nóserbaev jaraqat salý úshin Anıchıchke qasaqana sekiredi - ol jerde múlde dop úshin talas bolmaǵan! «Tobyldyń» shabýylshysy dene turqymen bizdiń qorǵaýshynyń basynan uryp ótken. Mundaı jaǵdaıda ony anyq alańnan alastaý kerek edi, alaıda arbıtr erejeniń buzylǵanyn tipti tirkegen de joq.
Oıynnan tys pozıtsııalardy sheksiz tirkeýler boldy. Olardyń qate tirkelip jatqanyn kózdi jumyp qoıyp kóre alasyz!
Shabýyldardy birneshe ret toqtatý, Kankavanyń qısynsyz dórekiligi birneshe ret kezdesedi!
Tomasov ótip ketkennen keıin Jýlpanyń óz aıyp alańynda ádeıi qolmen oınaýy. Biraq arbıtr úndemeı qoıa saldy.
Nóserbaev óziniń jazalanbaıtynyna kózi jetkennen keıin Klıaınhaıslerdi aıaǵymen tik kelip shabýyldaıdy - bar bolǵany oǵan sary qaǵaz beriledi. Al bul sát oıynshyǵa uzaq merzimge jaraqat salar edi.
Arbıtr Nóserbaevty taǵy aıap ketedi. Mýjıkovtyń áleýetti shabýylyn toqtatý kezinde arbıtr ekinshi sary qaǵazdy kórsetýdiń ornyna, «Tobyl» oıynshysyna qatysty eshqandaı shara qoldanbaıdy.
Fedın óz aıyp alańynda Despotovıchti soǵyp ketedi - vıdeoqaıtalaýda Fedınniń «Astana» shabýylshysyn aıaǵymen uryp ketkeni kórinip tur. 100 paıyz - penaltı. Alaıda Sahıdiń ysqyryǵy estilmeıdi.
Biz Qazaqstan fýtbol federatsııasy men Qazaqstannyń kásipqoı fýtbol lıgasyna hat daıyndap, kezdesýdiń basty arbıtri Danııar Sahıdiń jáne onyń kómekshileri - Sergeı Vasıýtınniń (Almaty) jáne Sergeı Kalachevtiń (Atyraý) áreketterine baǵa berýdi suraımyz. Tórelik etýshi brıgadanyń jumysy aldyn ala kesip-pishilgenin boljaıtyndaı bizde barlyq negiz bar. Biz Qazaqstandaǵy matchtarda qyzmet etý quqyǵynan Danııar Sahıdi shettetýge kúsh salyp, sonymen birge atalmysh referımen úshinshi tulǵanyń keliskeni týraly kúdigimiz dáleldense kúsh qurylymdaryn iske qosamyz.
Alekseı Bobrov pen Igor Aleshınniń shettetilýine ákep soqqan «kúmándi» matchtar men aldyn ala kesip-pishilgen uıǵarym boıynsha QFF-tyń qatal ári berik qaǵıdaty Sahı sekildi «referılerge» jetpegeni anyq. Biz onyń jaýapkershilikten jaltaryp ketpeı, jasaǵan isine qaraı jaýap berer degen úmittemiz.
Sonymen qatar, «Astana» fýtbolshylary Anıchıch pen Klıaınhaıslerge ádeıi jaraqat salýǵa tyrysqan «Tobyl» FK oıynshysy Tańat Nóserbaevty uzaq merzimge oıyndardan shettetýge kúsh salamyz.
Aıta keteıik, "Astana" - "Tobyl" matchy 5 shilde kúni Qostanaıdaǵy Ortalyq stadıonda ótken bolatyn. Oıyn 0:0 esebimen teń aıaqtaldy.
