«Tobyldyń» dırektory: Biz fýtbolshylardy satyp almaımyz
QOSTANAI. QazAqparat - «Tobyl» fýtbol klýby legıonerlerge jumsalǵan qyrýar qarjyny joqqa shyǵardy. Klýb dırektory Nıkolaı Panınniń aıtýynsha, oıynshylardyń aýys-túıisi týraly BAQ-ta jazylǵan aqparattardyń deni shyndyqqa janaspaıdy, dep habarlaıdy QazAqparat «Tobyl» FK-nyń saıtyna silteme jasap.
Jyl saıyn memleket qarjysynan elimizdegi fýtbol komandalaryna qarjy bólinetini ras. Jáne ol komandanyń jetistikterge jetýine septigin tıgizetini sózsiz.
Aıta ketý kerek, kóptegen mamandar ótken jylǵy «Tobyldyń» jetistigin qarjylyq jaǵdaılarmen baılanystyrdy, Sonymen qatar qarajaty jaǵynan eldegi eń baı klýb retinde qatarǵa qosty.
«Tobyl» FK dırektory Nıkolaı Panın «bári aqshaǵa baılanysty emes» deıdi.
«Osy jyly «Tobyl» ashyq saıasat ustanady, ıaǵnı biz bıýdjet týraly eshnárse jasyrmaımyz. 2019 jylǵy klýbtyń bıýdjeti úsh mıllıard teńge shamasynda. «Tobyl» fýtbol klýby - tek qana ondaǵan fýtbolshy jáne bapkerlik quram emes. Bizde Ekinshi lıgada óner kórsetetin qosalqy quram, Fýtbol ortalyqtary bar. Sońǵysynda júzdegen bala dop tebedi. Oǵan qosa, osy jyly qyzdar tobyna irikteý jınap jatyrmyz. Biz salyq retinde 150 mıllıon teńgeni el qazynasyna qaıtaramyz, 250 mıllıon teńge óskeleń urpaq arasynda fýtboldy damytý úshin jumsalady. Oıyn alańyn jalǵa alý, sport jabdyqtary, is-saparlar jáne basqalaryna aqsha jumsalady. Artyq qalǵan 2 mlrd 600 mln teńgeni kásibı komandalar - negizgi jáne qosalqy quramnyń shyǵyndaryna baǵyttaımyz. Bul somaǵa barlyq ákimshiliktiń jumysy men ınfraqurylymdyq nysandardy saqtaý kiredi», - deıdi Nıkolaı Panın.
Aıta ketý qajet, «Tobylǵa» qarajattyń edáýir bóligi demeýshilerden túsedi. Osy jyly da olar basty seriktesi «Polımetall» kompanııasynan 350 mıllıon teńge kómek kútedi.
«Qazirgi ýaqytta jańa seriktester men demeýshiler izdep jatyrmyz. «Tobyl» kóp jaǵdaıda oıynshylardy satyp almaıdy. Muny tekserý ońaı. Qazir biz bes jańa fýtbolshymen kelisimshartqa qol qoıdyq: Mıhaıl Gordeıchýk, Rýslan Valıýllın, Andreı Pasechenko, Aleksandr Kleşenko, Emıl Balaev. Olardyń barlyǵy erkin agent, ıaǵnı olardyń burynǵy jumys berýshilermen kelisimsharttary aıaqtaldy. Sondyqtan biz qarajat shyǵarǵan joqpyz», - deıdi klýb dırektory.
Nıkolaı Panın áleýmettik jelilerde jazylyp júrgen aqparattardy da joqqa shyǵarady. Onyń sózinshe, jaqynda jelide komandanyń Balaev úshin 52 myń eýro tólegeni týraly aqparat paıda boldy.
«Bul Transfermarkt taratqan jalǵan aqparat. Ol erkin agent retinde keldi. Bul jerde Valerıı Gazzaevtyń bedeli úlken ról atqardy. Biz ázirge «Tambov» fýtbol klýbymen kelisimshartty josparlap otyrmyz. Biraq, munda da jýrnalıster asyǵystyq tanytyp otyr. Senın Sebaı úshin «Tobyldyń» 500 myń eýro shyǵarǵany burys aqparat. Ol úshin 50 myń dollar tóleımiz.
Bul rette klýbtyń transferlik kezeńdegi qyzmeti aıaqtalady, biraq bıýdjetpen jumys jalǵastady. Keıbir oıynshylardyń bizdiń klýbymyzǵa qarjylyq júktemeni azaıtý úshin jalǵa beretinimizdi joqqa shyǵarmaımyn», - dep túsindirdi klýb basshysy.
