«Tobyldyń» bas bapkeri klýbtan ketetinin aıtty
QOSTANAI. QazAqparat - Qostanaılyq «Tobyl» fýtbol komandasynyń bas bapkeri klýbtan ketý týraly sheshim qabyldady, dep habarlaıdy QazAqparat tilshisi.
Vladımır Nıkıtenko «Tobyldyń» Eýropa Lıgasyndaǵy joryǵy aıaqtalǵan soń klýb basshylyǵynan qyzmetinen bosatýdy ótingen.
«Bas bapker «Pıýnıkpen» bolǵan oıynnan soń qyzmetinen bosatýdy surady. Klýb basshylyǵy men bas bapkerdiń arasyndaǵy eńbek shartyn toqtatý týraly sheshim áli shyqqan joq», - dedi «Tobyl» fýtbol klýbynyń medıa-ofıtseri Konstantın Doljanskıı agenttik tilshisine.
Eske salsaq, keshe Erevan qalasynda fýtboldan Eýropa lıgasynyń ekinshi irikteý kezeńinde Qostanaıdyń «Tobyly» jergilikti «Pıýnık» komandasymen kezdesip, 0:1 esebimen jeńilip qalǵan bolatyn.
