Tobyl stantsııasyndaǵy astyq qaldyqtary qoımasynda iri órt boldy

QOSTANAI. QazAqparat – Qostanaı oblysynyń Tobyl stantsııasynda ornalasqan elevator aýmaǵynda órt boldy, dep habarlaıdy QazAqparat tilshisi.

Oqıǵa ornynan jasalǵan vıdeo @Lisakovsk.life jergilikti pablıginde jarııalandy.

«Saǵat 05:54-te B. Maılın aýdany, Tobyl kentindegi Elevatornaıa kóshesinde «Tobyl elevatory» JShS aýmaǵynda astyq qaldyqtarynyń qoımasy janyp jatqany týraly habarlama tústi. Órtti sóndirýge Tótenshe jaǵdaılar departamentiniń órt sóndirý bólimsheleri, elevatordyń memlekettik emes órtke qarsy qyzmeti jáne «QTJ»UK» AQ órt sóndirý poıyzy jumyldyryldy», - dep habarlady oblystyq TJD-dan.

Jalyn saǵat 14:34-te sóndirildi.

«Órtten № 25, 26 qoımalar ( 2 400 sharshy metr aýmaqta), keptirý-jóneltý munarasynyń ǵımaratynda qabyrǵa qaptamasy ( 40 sharshy metr), sondaı-aq 1 040 tonna zyǵyr joıyldy. Órt sharpyǵan jalpy aýmaq 2440 sharshy metrdi qurady. Qaza bolǵandar men zardap shekkender joq», - dep tolyqtyrdy departamentten.

Boljam boıynsha, órttiń sebebi – №25 qoımadaǵy taratý qorabynda ( qalqan) bolǵan qysqa tuıyqtalý.

Vıdeodan alynǵan kadr