Tobyl ózeninen 4 tonna qoqys shyǵaryldy
QOSTANAI. QazAqparat - Tobyl ózenin abattandyrý jumystary Sadovoe aýylynda júrgizildi, dep habarlaıdy QazAqparat tilshisi.
Qostanaıdaǵy kóktemgi tazalyq sharalary barysynda Tobyl ózenin qoqystardan tazartý jumystary qolǵa alyndy. Búgin oblystyq orman sharýashylyǵy jáne janýarlar dúnıesi ınspektsııasynyń uıymdastyrýymen Qostanaı aýdanyna qarasty Sadovoe aýylynyń aýmaǵynda da tazalyq jumystary ótti. Tıisti mekeme qyzmetkerleri ózen jaǵalaýyn turmystyq qaldyqtardan tazartty. Inspektsııanyń balyq sharýashylyǵy bóliminiń bas mamany Marjan Dandýbaevanyń sózinshe, adamdar balyq aýlaıtyn quraldaryn, jeke jabdyqtaryn ózen jaǵasynda qaldyryp ketken. Sonyń kesirinen ózen kóbirek lastanýda.
«Sadovoe aýyly mańynan Tobyl ózeni aǵyp jatyr. Jaz aılarynda qostanaılyqtardyń jıi kelip demalatyn orny bolǵandyqtan, ózenniń osy tusy bylǵanyp ketken. «Taza sý aıdyndary» aktsııasy aıasynda ózen boıy men jaǵalaýda qyrýar sharýa atqarylyp, tórt tonnaǵa jýyq qoqys shyǵaryldy jáne balyq aýlaýǵa arnalǵan 25 tor sýdan alyndy. Demalýshylar qorshaǵan ortaǵa beıjaı qaraıdy. Jaqyn jerde turatyndar aýlasynan shyqqan qoqysty da osynda ákelip tógedi», - deıdi maman.
Eske salsaq, bıyl Tobyl ózeniniń Qostanaı shekarasyndaǵy bóligin tazartý jumystary aıaqtalady. Qostanaı oblystyq Tabıǵat qorlary jáne tabıǵatty paıdalanýdy retteý basqarmasy basshysy orynbasary Samat Qalıevtiń aıtýynsha, Tobyl ózeni arnasyn abattandyrý jumystary 2008 jyldan beri júrgizilip keledi.
