Tobyl ózenin tazartý úshin 44 mln teńge qajet
QOSTANAI. QazAqparat - Kelesi jyly Tobyl ózeniniń Qostanaı shekarasyndaǵy bóligin tazartý jumystary aıaqtalady, dep habarlaıdy QazAqparat.
Qostanaı oblystyq Tabıǵat qorlary jáne tabıǵatty paıdalanýdy retteý basqarmasy basshysy orynbasary Samat Qalıevtiń aıtýynsha, Tobyl ózeni arnasyn abattandyrý jumystary 2008 jyldan beri júrgizilip keledi. Ýaqyt óte kele ózen taıazdanyp, demalýshylarǵa yńǵaısyzdyq týdyrǵan.
«Jaǵalaýdaǵy qamystardy shaýyp jatyrmyz. Úkimettiń jospary boıynsha qarajat bólinedi. Sol aqshany jetkizý úshin únemmen jumys istelinýde. Greıfer ár metr saıyn ózen túbinen balshyq aralas qoqysty súzedi. Tobyldyń lastaný deńgeıin meılinshe tómendetý úshin ózendi jaǵalaı ornalasatyn arnaıy sýdy qorǵaý aýmaqtary paıda bolady. Onyń jobasy daıyn tur. Buǵan kelesi jyly 44 mln teńge qarastyrylǵan», - dedi Qalıev.
Vedomstvo ókili málimdegendeı, osynsha qarjyǵa ózen arnasyn tazartýdy bılik basyndaǵylar biraýyzdan quptap otyr. Jıynda qarajat mólsheri men jumys kólemin jylma-jyl ulǵaıtý kerektigi aıtyldy.
