«Tobyl» óz alańynda jeńiske jetti

Alǵashqy mınýttardan-aq, alań ıeleri basymdyqty ózderinde ustady. 11-shi mınýtta Dıdar Jalmuqan óz komandasyna buryshtama dobyn ákeldi. Al Nurbol Jumasqalıevtiń enshisinde bolǵan dopqa Jasulan Moldaqaraev birinshi jetti. Onyń qulap baryp urǵan doby Kotlıar qorǵaǵan qaqpanyń alys buryshyna tústi. Esep - 1:0. Aıta keteıik, bul - J.Moldaqaraevtyń "Aqjaıyq"qaqpasyna soqqan ekinshi goly.

Jyldam gol soǵyp alǵan soń, R.Evdokımov shákirtteri qorǵanysyn myǵymdaýǵa kóshkendeı. Shabýylshylarǵa dem berip júrgen Kvekveskırı men Mýhýtdınov óz aıyp alańdaryna jaqyn qımyldady. "Aqjaıyq" surmergeni Marko Dýrovıch qorǵaýshylardan sytylyp ótip, soqqy jasady. Alaıda Nepogodov óz ornynda. "Tobyl" qaqpasynyń mańyndaǵy qarbalastan keıin Konstantın Zarechnyı tóreshiden penaltı surady. Alaıda, tóreshi basqasha sheshim qabyldady. Oıynshyǵa ótirik qulaǵany úshin "sary" qaǵaz kórsetildi.

Taım ortasyna taman alań ıeleri esepti eseleıtin múmkindikti múlt jiberdi. Orta tustan uıymdastyrylǵan shabýylǵa Nurbol Jumasqalıev ún qosty. Nıka Kvekveskırıden pas alǵan ol, J.Moldaqaraevqa dop berdi. Qaqpaǵa jaqyn tustan aýtqa tepken Jasulan san sıpap qaldy.

Ekinshi taımda alańǵa Alekseı Şetkın shyqty. Ol A.Lýllakýdy almastyrdy. 50-inshi mınýtta Konstantın Zarechnyı aıyp alańynan táp-táýir soqqy baǵyttady. Bul joly da Nepogodov qyraǵylyq tanytty.

Denıs Glavınanyń jeıdesinen tartyp qulatqan Dıdar Jalmuqan osy maýsymdaǵy ekinshi eskertý qaǵazyn aldy. "Tobyl" qarymta shabýyldarǵa ıek artýda. Mıroshnıchenko men Jýlpa asyrǵan pastar "Aqjaıyq" qorǵaýshylaryn ábden sarsańǵa túsirdi. Biraq, oraldyq jigitter sharshańqy kórindi.

Match sońyna qaraı qostanaılyqtar ekinshi dobyn soqty. Bul joly Samat Jarynbetov "Tobyl" sapyndaǵy birinshi golyna kórimdik surady. Oǵan múmkindik jasaǵan - Alekseı Şetkın. Іle-shala qanjyǵasyn maılar sátti Nıka Kvekveskırı paıdalana almady. 

Toqsan mınýt te túgesildi. Osylaısha, «Tobyl» kópten kútken jeńisine qol jetkizdi.