«Tobyl» óz alańynda «Aqsý» komandasyn jeńdi

ASTANA. QazAqparat – Búgin fýtboldan Premer-lıga komandalary arasyndaǵy el birinshiliginiń 1-týryndaǵy úshinshi kezdesý aıaqtaldy, dep habarlaıdy QazAqparat tilshisi.

Qostanaılyq «Tobyl» óz alańynda Pavlodar oblysynyń «Aqsý» komandasymen kezdesti.

Oıyn barysynda qostanaılyq klýbtyń basymdyǵy baıqalyp turdy. Komanda quramynan bıyl birqatar fýtbolshy ózge ujymdarǵa aýysyp ketti. Soǵan qaramastan, búgingi kezdesýde jınaqy qımyl kórsetti.

Aldymen, «Tobyl» sapynan Mılan Výkadınovıch 9, Islam Chesnokov 59-mınýttarda gol soqsa, oǵan 66-mınýtta «Aqsý» oıynshysy Tonı Sılva bir golmen jaýap berdi.

Qorytyndy esepti 91-mınýtta qostanaılyq komandadan Serj Deble belgiledi.

Osylaısha, kezdesý «Tobyldyń» basymdyǵymen 3:1 esebimen aıaqtaldy.

Dál qazir elordada «Astana» men «Shahter» (Qaraǵandy) kezdesýi ótip jatyr.

Sondaı-aq, búgin «Ordabasy» óz alańynda «Kaspııden» basym tússe, «Aqtóbe» syrt alańda «Jetisýdy» súrindirdi.

Erteń, 5 naýryzda «Maqtaral» (Túrkistan oblysy) men «Oqjetpes» (Kókshetaý), «Qaırat» (Almaty) pen «Atyraý», «Qaısar» (Qyzylorda) men «Qyzyljar» (Petropavl) sheberlik baıqasady.