«Tobyl» oıynshysy tóbeles shyǵardy
QOSTANAI. QazAqparat - Túrkııada oqý-jattyǵý jıyndarynda júrgen «Tobyl» reseılik «Anjı» klýbymen joldastyq kezdesý ótkizdi, dep habarlaıdy QazAqparat.
«Tobyl» Túrkııadaǵy altynshy baqylaý matchyna shyqty. Bul joly qostanaılyqtarǵa ataqty Roberto Karlostyń burynǵy komandasy - «Anjı» qarsy turdy. «Tobyldyń» bas bapkeri Vladımır Nıkıtenko bul joly negizgi quramǵa qaralymda júrgen fýtbolshylardy qoıdy. Birinshi taımda Baýyrjan Turysbek pen Maksım Fedın gol soǵatyn múmkindikterge ıe bolǵan. Alaıda, olarǵa dáldik jetispedi.
Oıynnyń ekinshi bóliginde «Anjı» oıynshysy Hýan Leskano ádemi goldyń avtory atandy. Ol áriptesi Býdkovskııden pas alyp, alystan shirene tartty. Esep 1:0!
Kezdesý aıaqtalar tusta qostanaılyq komandanyń jartylaı qorǵaýshysy Djaba Kankava «Anjı» oıynshysy Arsen Hýbýlovpen tóbelesip qaldy. Bir-birine judyryq jumsaǵan qos fýtbolshy alańnan qýyldy.
Endi «Tobyldyń» kelesi oıyny 8-aqpanda Reseıdiń «Tom» klýbyna qarsy ótpek.
