«Tobyl» kókshetaýlyq klýbty iri eseppen utty
QOSTANAI. QazAqparat - Qazaqstan chempıonatynyń 31 týrynda qostanaılyq "Tobyl" Kókshetaýdyń "Oqjetpesin" qabyldap, 4:1 esebimen jeńiske jetti, dep habarlaıdy QazAqparat tilshisi.
Tóreshi ysqyryǵy estilisimen "Tobyl" oıynshylary qarsylastar qaqpasyna lap qoıdy. Nebári 1-mınýtta Jasulan Moldaqaraev "Tobyl" komandasyn alǵa shyǵardy. Alań ıeleri birinshi taımnyń shırek bóligine deıin oıyn qarqynyn túsirgen joq. Jyldam gol soǵyp alǵan Evdokımov shákirtteri álsin-álsin shabýyldar uıymdastyrdy. Munan soń olar taǵy da esepti eseledi. Sol qaptalda atoı salyp júrgen Dıdar Jalmuqan Alekseı Şetkınge dál pas berdi. Sońǵysy dopty aıyp alańyna jalǵady. Kerek jerden tabylǵan Egon Výh qatelespedi. 2:0. Qostanaılyqtar "Oqjetpes" oıynshylarynyń shabýylǵa shyǵýyna múmkindik berer emes. Bul rette "Tobyldyń" qos qaptaldaǵy oıynshylaryn aıta ketý kerek. Birde Jalmuqan, endi birde Výh aıyp alańyndaǵy shabýylshylardy paspen qamtamasyz etýde. Taım aıaǵyna taman Egon Výh óziniń ekinshi golyna "kórimdik" surady. Nıka Kvekveskırıden dop alǵan ol oılanbastan alys buryshqa tepti. Al "Oqjetpes" qaqpashysy Rýslan Abjanov jyldam kelgen dopty qaıtara almady. Tablodaǵy esep taǵy da ózgerdi. Ekinshi taımda qostanaılyq komanda qorǵanysqa kóńil bólgen sekildi. Oıynnyń birinshi bóliginde shabýylǵa dem berip júrgen Artýras Jýlpa qorǵaýshylarǵa jaqyn júrdi. Kókshelikter sapynan Aleksandr Kozlov pen Tımýr Dosmaǵambetov bir-eki ret alystan soqqy baǵyttap kórdi. Degenmen, "Tobyl" qaqpashysy D.Nepogodov qaýiptiń betin qaıtara bildi. "Tobyl" quramyna Raýl Djalılov qosyldy. Ol Dıdar Jalmuqandy almastyrdy. Tyń oıynshy shyǵysymen tobyldyqtar taǵy da esepti arttyrdy. Alań ortasynan bastalǵan shabýyldy Alekseı Şetkın óristetti. Ol búgingi oıynnyń úzdik fýtbolshylarynyń biri Egon Výhty qaqpashymen betpe-bet jiberdi. Óz kezeginde výh dopty aınaldyra tepti. 4:0! Osy oıynda úsh golǵa múmkindik jasaǵan Alekseı Şetkın qanjyǵasyn maılar múmkindikke ıe boldy. Átteń, onyń soqqysy qaqpa baǵanasynan serpilip, keıin qaıtty.Sálden soń alańǵa jańa qosylǵan Azdren Lýllaký sóz aldy. "Oqjetpes" qorǵaýshylaryn aldap ótip, Jasulan Moldaqaraevqa pas berdi. Biraq, shabýylshyǵa dáldik jetispedi. Kókshetaýlyq jigitter esep aıyrmasyn qysqartty. Sergeı Keıler bergen dopty qostanaılyq jankúıerlerge jaqsy tanys Oleg Nedashkovskıı golǵa aınaldyrdy. Ary qaraı oıyn qarqyny báseńdedi, "Tobyl" match aıaǵyna deıin dopty ózderinde ustady.
Osylaısha, qostanaılyq ujym kópten kútken jeńisine qol jetkizip, tórtinshi satyǵa kóterildi. Kelesi oıyn Qaraǵandyda ótedi.
