«Tobyl» klýbyna sońǵy oqıǵadan keıin jańa dáriger keldi
QOSTANAI. QazAqparat - «Tobyl» fýtbol klýbynyń quramyna jańa dáriger tanystyryldy, dep habarlaıdy QazAqparat klýbtyń saıtyna silteme jasap.
Komandaǵa qazaqstandyq maman Vadım Ivanov keldi. Onyń mamandyǵy - dáriger-hırýrg jáne sport dárigeri. Ol M. Ospanov atyndaǵy Batys Qazaqstan memlekettik medıtsına akademııasy men S. D. Asfendııarov atyndaǵy Qazaq ulttyq medıtsına ýnıversıtetin aıaqtaǵan.
Buǵan deıin «Aqtóbe» fýtbol klýby qosalqy quramynyń, «Aqjaıyq» jáne «Atyraý» komandalarynyń dárigeri bolǵan. Vadım Ivanov Qazaqstan jastar quramasynyń dárigeri bolyp ta jumys istedi.
Aıta keteıik, Qazaqstan chempıonatynyń 8-shi týryndaǵy «Astana» - «Tobyl» kezdesýine alań qonaqtarynyń eki fýtbolshysy shyqpaı qalǵan edi. Munyń sebebin bas bapker Vladımır Gazzaev túsindirdi.
«Astanamen» oıynnyń aldynda Senın Sebaı men Dmıtrıı Mıroshnıchenko ózderin jaısyz sezinip, dárigerdiń kómegine júgindi. Aýrýhanada olardy jansaqtaý bólimine jatqyzdy. Sebebi, olardyń taǵamnan ýlanǵany anyqtaldy. Qazir Mıroshnıchenkonyń jaǵdaıy aýyr. Dárigerler onyń ómiri úshin kúresip jatyr», - degen bolatyn komandanyń bas bapkeri.
Sonymen qatar, jumysyna salǵyrt qaraǵany úshin «Tobyl» klýbynyń dárigeri Aleksandr Kım qyzmetinen bosatyldy.
