«Tobyl» - Qazaqstan sýperkýbogynyń ıegeri
NUR-SULTAN. QazAqparat - Qostanaıdyń «Tobyl» komandasy bıyl fýtboldan Qazaqstan sýperkýbogynyń ıegeri atandy, dep habarlaıdy QazAqparat tilshisi.
Sýperkýbokti ótken maýsymnyń chempıony - qostanaılyq «Tobyl» men kýbok ıegeri - almatylyq «Qaırat» sarapqa saldy.
Kezdesý barysynda qos komanda alǵa qaraı umtyldy. Osyndaı sáttiń birinde almatylyq komanda qorǵaýshylary ózderiniń aıyp alańynda qarsylasty shalyp shyqty. Bas tóreshi Danııar Sahı on bir metrlik núkteni kórsetti. Qostanaılyq Serikjan Mýjıkov penaltıden múlt ketken joq. Birinshi kezeńniń sońyna taman almatylyq klýbtan Joao Paolonyń alystan tepken doby qaqpa torynda týlap jatty.
Ekinshi kezeńde eki komanda taǵy bir gol soǵý múmkindigin izdedi. 62-mınýtta «Tobyl» qaqpasyna belgilengen penaltıdi «Qaırat» fýtbolshysy Rıkardý Alvesh nysanaǵa týra baǵyttaı alǵan joq. Esesine 83-mınýtta qostanaılyq fýtbolshy Aıbar Jaqsylyqov jeńis golyn soǵyp ketti.
Osylaısha «Tobyl» qarsylasynan 2:1 esebimen basym tústi. Qostanaılyq klýb ekinshi jyl qatarynan sýperkýbok ıegeri atandy.
Eske salsaq, bıyl el birinshiligi 5 naýryzda jalaýyn kóteredi. Alǵashqy týrda 5 naýryzda «Kaspıı» (Aqtaý) men «Qyzyljar», «Turan» (Túrkistan) men «Taraz», «Atyraý» men «Aqsý» (Pavlodar oblysy), «Astana» (Nur-Sultan) men «Shahter» (Qaraǵandy), «Ordabasy» (Shymkent) men «Maqtaaral» (Túrkistan oblysy) komandalary kezdesedi.
