Tobyl qalasynda medıtsınalyq qaldyq salynǵan jáshik tabyldy
TOBYL. QazAqparat – Tobyl qalasynyń polıtsııa bólimi ǵımaraty mańynan medıtsınalyq qaldyq salynǵan jáshik tabyldy, dep habarlaıdy QazAqparat.
Qaýipti medıtsınalyq qaldyqtar týraly habarlama áleýmettik jelilerde jarııalandy. Osyǵan baılanysty polıtseıler aýmaqty qorshap, sanıtarlyq-epıdemııalyq ortalyqtyń mamandaryn shaqyrdy.
«5 aqpan kúni saǵat 18:00 shamasynda Tereshkova kóshesiniń boıyndaǵy avtoturaqtan medıtsınalyq qaldyq salynǵan jáshik tabyldy. Polıtsııaǵa jergilikti órt sóndirý bóliminiń qyzmetkeri habar berdi. Sanıtarlar jáshik ishinde 20 shaqty ekpe quraly men paıdalanylǵan qolǵaptar baryn anyqtady. Medıtsınalyq quraldar SES zertteýine jiberildi. Olar adam densaýlyǵyna qaýipti emes», - dedi oblystyq polıtsııa departamentiniń baspasóz hatshysy Irına Bejenar agenttik tilshisine.
Qazir polıtseıler kúmándi jáshikti tastaǵandardy izdestirip jatyr.
