«Tobyl» fýtbolshylary 23 jastaǵy jigittiń emi úshin jeıdelerin satty
QOSTANAI. QazAqparat – Búgin qostanaılyq «Tobyl» fýtbol klýbynyń ujymy qaıyrymdylyq aýktsıonnyn ótkizdi, dep habarlaıdy QazAqparat komandanyń baspasóz qyzmetine silteme jasap.
«Týrıst» qonaqúıinde «Tobyl» oıynshylarynyń jeıdeleri bássaýdaǵa tústi. Osymen segizinshi ret ótkizilip otyrǵan qaıyrymdylyq aýktsıonyna qostanaılyq birneshe fýtbolshynyń kıimi satyldy. Bul sharanyń maqsaty – kómekke zárý Adıs Temirovke qol ushyn sozý. Ony aman alyp qalý úshin Túrkııada ota jasaý kerek.
Oǵan úshinshi dárejeli muryn-ishek qaterli isigi dıagnozy qoıylǵan. Bássaýdaǵa Artem Sherstov, Danııar Semchenkov, Senın Sebaı jáne Fernander Kassaı syndy fýtbolshylar qatysty.
Áýelgide jınalǵandar asa belsendilik tanyta qoımaǵanmen bara-bara aýktsıon qyza tústi. Bastapqyda 1000 teńgeden bastalǵan fýtbolkalar ártúrli baǵalandy. Máselen, chehııalyq legıoner Egon Výhtyń kıimi 5000 teńgege satylsa, Baýyrjan Turysbek kıgen formasy 10000 teńgege ótip ketti. Al Fernander Kassaıdyń jeıdesi eń qymbat baǵaǵa satyldy. Ol úshin fýtbolshy Senın Sebaı 20000 teńgesin aıamady.
«Mundaı qaıyrymdylyq aktsııasyn klýb jyl saıyn uıymdastyrady. Maqsatymyz aýyr naýqasqa shaldyqqan balalarǵa shama-sharqymyzsha qarjylaı kómek berý. Qoǵamnyń bir bólshegi – bala densaýlyǵyna qostanaılyqtar eshqashan beı-jaı qaraǵan emes. Sondyqtan, aýktsıonǵa qatysýshylar óte saýapty iske uıytqy boldy dep batyl aıta alamyn»,-deıdi «Tobyl» fýtbol klýbynyń jankúıerlermen baılanys jónindegi mamany Marat Kúzembaev.
Aýktsıonǵa jınalǵan qarjy Adıstyń anasy Elvıra Temirovaǵa tapsyryldy.
