«Tobyl» fýtboldan UEFA Konferentsııa lıgasy úshinshi irikteý satysyna joldama aldy
NUR-SULTAN. QazAqparat - Qostanaıdyń «Tobyly» fýtboldan UEFA Konferentsııa lıgasy úshinshi irikteý satysyna joldama aldy, dep habarlaıdy QazAqparat tilshisi.
Búgin qostanaılyq klýb syrt alańda Gıbraltardyń «Lınkoln Red Imps» komandasymen qarymta oıyn ótkizdi.
Oıyn barysynda 31-mınýtta «Tobyl» sapynan Zoran Toshıch mergendik tanytty. Osylaısha ol óz komandasyna jeńis syılady.
«Tobyl» qarsylasyn 1:0 esebimen súrindirip, jarystyń kelesi satysyna joldama aldy.
Eki komanda arasyndaǵy alǵashqy kezdesýde qostanaılyq klýb 2:0 esebimen basym túsken bolatyn.
Aıta ketsek, atalǵan juptyń jeńimpazy úshinshi irikteý satysynda «Tırana» (Albanııa) jáne «Zrınskı» (Bosnııa ı Gertsegovına) jubynyń jeńimpazymen kezdesedi. Oıyndar 4 jáne 11 tamyz kúnderi ótkiziledi.
Sondaı-aq, ekinshi irikteý satysynda qazaqstandyq «Astana» Polshanyń «Rakýv» komandasynan 0:5, «Qaırat» Vengrııanyń «Kashverdasynan» 0:1, «Qyzyljar» Horvatııanyń «Osıeginen» 1:2 esebimen jeńilip qaldy.
Atalǵan komandalar qarymta kezdesýdi 28 shilde kúni ótkizedi.
