«Tobyl» fýtbol klýby jańa oıynshy satyp alý quqyǵynan aıyryla ma
Reseılik fýtbol mamany Dmıtrıı Vasılev jelidegi paraqshasynda FIFA Halyqaralyq fýtbol uıymynyń Qostanaı klýbyna jańa oıynshylardy tirkeýge tyıym salǵanyn habarlaǵan edi. Atalmysh sanktsııa «Tobylǵa» óziniń burynǵy fýtbolshysy Fernander Kassaıǵa eńbek kelisimshartyn zańsyz toqtatqany, qaryzyn tóleýge mindettegen qaýlysynyń oryndalmaǵany úshin qoldanyldy-mys». Eger afrıkalyq fýtbolshy bir aı ishinde aqshasyn almasa, klýbtan birneshe upaı alyp tastalýy múmkin ekeni aıtyldy.
Bul suraqtyń jaýabyn «Tobyldyń» baspasóz qyzmetinen suradyq. Klýb málim etkendeı, rasymen de, keshe klýbqa FIFA Tártiptik komıtetinen habarlama kelgen, onda FIFA sheshiminiń oryndalmaýyna baılanysty oıynshylardyń halyqaralyq jáne ishki aýys-túıisterine «transferlik tyıymnyń» salynǵany jazylǵan.
«Biraq búgin biz sol uıymnan basqa hat aldyq jáne resmı túrde habarlaımyz: «Tobylǵa» qatysty engizilgen «transferlik tyıym» – FIFA tarapynan ketken tehnıkalyq qatelik. Osylaısha, «Tobyl» FK jańa oıynshylardy tirkeýdi jalǵastyra alady. Sary-jasyldar jankúıerleriniń alańdaýyna esh negiz joq», - dep jazdy «Tobyl» klýby resmı saıtynda.
