«Tobyl» fýtbol klýby satylady
QOSTANAI. QazAqparat - Jekeshelendirýdiń 2016 - 2020 jyldarǵa arnalǵan keshendi jospary sheńberinde Qostanaı oblysyndaǵy 22 nysan básekeles ortaǵa beriledi. Bul týraly apparat májilisinde ótken jıynda oblystyq qarjy basqarmasynyń basshysy Alma Júsipova málim etti, dep habarlaıdy QazAqparat tilshisi.
Jekeshelendirýdiń keshendi josparyna sáıkes, oblys boıynsha 9 nysan satyldy, al 11-i taratylý protsesinde. Al «Іsker Arqalyq» jaýapkershiligi shekteýli seriktestigi jekeshelendirýge jatatyn obektiler tiziminen alynyp tastaldy. Sondaı-aq, «Tobyl» fýtbol klýby men Qostanaı qalasyndaǵy «Tazalyq-2012» JShS qaıtadan saýdaǵa qoıyldy. Obektilerdi satý bıyl qyrkúıek aıyna deıin aıaqtalmaq.
«Búginde óńirdegi 5 nysan taratý kezeńinde tur. Olar: «Jataqhana» jaýapkershiligi shekteýli seriktestigi, Jastar bastamalary ortalyǵy, «Sport saraıy» memlekettik kommýnaldyq kásiporny, «Basseın» kásiporny, «Komsomol qus fabrıkasy» aktsıonerlik qoǵamy. Keshendi jospardan tys satylǵan obektilerdi esepke alǵanda, barlyǵy 285,8 mln teńge somasyna 12 uıym satyldy. Olar tender nemese aýktsıon arqyly júzege asty. Tájirıbe kórsetkendeı, obektiler kóbine ekinshi nemese úshinshi saýda-sattyqta ótkiziledi. Zańnamaǵa sáıkes, ekinshi nemese úshinshi tenderge shyǵarǵan kezde satý baǵasy 50%-ǵa tómendeıdi», - dedi A.Júsipova.
Qarjy basqarmasy basshysynyń aıtýynsha, obektilerdi jekeshelendirý oblystyń ekonomıkasyna oń áserin tıgizedi.
«Birinshiden, nysandar básekeles ortaǵa beriledi, ekinshiden, obektilerdi satýdan bıýdjettiń kiris bóligi tolyqtyrylady. Buǵan qosa bıýdjettik shyǵyndar tómendeıdi. Qoldanystaǵy zańnamanyń talaptaryna sáıkes, úsh saýda-sattyq nátıjeleri boıynsha satylmaǵan obektilerdi taratý jóninde shara qabyldanady», - dedi ol.
Qazirgi ýaqytta senimgerlik basqarýǵa berilgen 4 nysan bar. Atap aıtqanda, Jangeldın aýdanyndaǵy «Bizdiń Torǵaı» gazetiniń 50 % úlesi «Torǵaı medıa» jaýapkershiligi shekteýli seriktestigine berildi. Al «Atameken Qostanaı» mıkroqarjylyq uıymynyń 49 % úlesi Qostanaı oblysynyń Kásipkerler palatasyna qosyldy. Bıýdjettik shyǵyndardy ońtaılandyrý maqsatynda 5 kásiporyn biriktirildi. Máselen, Rýdnyı qalasynyń «Áıet», «Atlet» jáne «Qýat» sport klýbtary «Muzdy saraı» quramyna endi. Arqalyq jáne Áýlıekól aýdanaralyq jol paıdalaný uıymdary Qostanaı jol paıdalaný kásipornyna qosyldy.
