«Tobyl» fýtbol klýby qarjylyq daǵdarysqa tap boldy – klýb basshysy

Nıkolaı Panın belgili fýtbol mamany Vladımır Gazzaevpen ne úshin kelisimshartty úzgenin túsindirdi. Onyń aıtýynsha, komandadaǵy qarjylyq jaǵdaı osyndaı sheshim qabyldaýǵa májbúr etken.

«Aldymen, qazaqstandyq barsha jankúıer aldynda keshirim suraımyn. Eýropa lıgasynda sátsizdikke ushyraǵanymyz ras. Árıne, kez kelgen ujymda mundaı jaǵdaılar bolady. Qazir biz sondaı kúı keship otyrmyz. Fýtbolshylar da, klýbtyń jumyskerleri de shamaly daǵdarysty bastan ótkerip jatyr. Biz Vladımır Valerevıchke Qostanaıdaǵy eńbegi úshin rahmet aıtamyz. Degenmen, «Tobyldyń» bıýdjeti bárin kótere bermeıdi. Bıýdjetti ońtaılandyrý Eýropa lıgasyna deıin de qozǵaldy. Komandaǵa Eýropa lıgasynyń eki kezeńinen ótý mindeti qoıyldy. Munan soń biz ÝEFA tarapynan túsetin tólemderge úmit arttyq. Degenmen, biz birinshi kezeńnen ári asa almadyq. Qazir klýbta shyǵyndar qaıta eseptelip jatyr. Komanda basshylyǵy fýtbolshylarǵa jumsalatyn qarjyny azaıtý týraly usynys aıtty. Alaıda, Vladımır Gazzaev bul usynysty qoshtamady, munan soń ózi jumystan ketýge sheshim qabylady. Onymen birge kómekshisi Nıkolaı Latysh ta ketti», - deıdi Nıkolaı Panın.

Sonymen qatar, komandadaǵy qıyn jaǵdaıdy eskergen tehnıkalyq dırektor Vladımır Nıdergaýs pen bapker Andreı Mıroshnıchenko da óz erkimen jumystan ketken. Alaıda, qazir komanda quramyndaǵy fýtbolshylar jalaqynyń tómendeýine qarsylyq bildirmegen.

«Vladımır Gazzaev suhbatynda komandanyń «altynǵa» talasatynyn aıtqan edi. Bul durys emes. Qarjylyq jaǵdaıdyń qıyndaǵany sonshalyq, chempıondyq týraly áńgime bolǵan emes. Jaqynda «Astananyń» jyldyq bıýdjetiniń bizden úsh ese joǵary ekenin bildik. Biz birinshi oryn alý úshin áýeli quramdy kúsheıtýimiz kerek. Al ol úshin qarjynyń keregi sózsiz», - dep túıdi klýbtyń dırektory.

Eske salsaq, Eýropa lıgasyndaǵy sátsiz oıynnan soń «Tobyl» fýtbol klýbynyń bas bapkeri Vladımır Gazzaev jumysynan ketken bolatyn.