«Tobyl» chempıondyqqa qol sozdy - premer-lıga
ALMATY. 2 qarasha. QazAqparat /Erbol Turymbetov/ - Fýtboldan Qazaqstan premer-lıgasynyń sońǵy týrlary óte shıelenisti tartystarmen órbýde. Kósh bastaǵan qos komanda «Aqtóbe» men «Tobyl» arasyndaǵy upaı aıyrmashylyǵy 31-týrda da ózgerissiz qaldy.
«Aqtóbe» óz alańynda «Atyraýdy» 2:0 esebimen tize búktirdi. Symaqov 61 mınýtta penaltıdi múltiksiz oryndasa, Haırýllın 72 mınýtta esepti eseledi. «Tobyl» da óz jerinde «Lokomotıvten» basym tústi. Esep: 2:0.
Gol ıeleri Baqaev 31 jáne Qýantaev 86. Endi chempıondyqtyń taǵdyry sońǵy 32-týrda sheshilmek. Syrt alańda «Shahtermen» aıqasatyn Vladımır Muqanov shákirtteriniń qolynan bar keletin nárse - sol oıynnan 3 upaı oljalaý. Qalǵany «Atyraý» tórinde kezdesý ótkizetin «Tobyldyń» óz qolynda. «Altynnyń» ıegeri osy kezdesýlerden keıin belgili bolmaq.
Al oǵan deıin, premer-lıgamen qoshtasatyn eki komanda anyqtaldy. Olar «Qaırattan» sońǵy mınýttarda tóreshiniń arqasynda dop jiberip alǵan «Oqjetpes» pen Taldyqorǵanda tas talqany shyqqan «Aqjaıyq». Kerekýden kelgen Antonov almatylyq komandaǵa qosymsha ýaqytta aıyp dobyn belgilep, oıyndaǵy jalǵyz doppen «Qaırat» 3 upaıyn enshiledi.
Qalǵan oıyndarda «Ertis» - «Shahter» 1:0, «Jetisý» - «Aqjaıyq» 4:2, «Ordabasy» - «Taraz» 1:0.
Jalpy týrnır kestesin 1-6 oryndary boıynsha, «Tobylda» 61, «Aqtóbede» 60, «Ertiste» 53, «Lokomotıvte» 50, «Atyraýda» 44, «Shahter» enshisinde 41 upaı.
Al 7-12 oryndar boıynsha, «Jetisýda» 49, «Ordabasyda» 45, «Tarazda» 36, «Qaıratta» 28, «Aqjaıyqta» 23 jáne «Oqjetpes» qorjynynda 22 upaı.
Surmergender qatarynda Ulyqbek Baqaev 16 doppen kósh basynda tur. Onan soń Georgıı Daskalovta 15 jáne Nurbol Jumasqalıevte 14 dop.
