«Tobyl» bıylǵy birinshilikte alǵash ret jeńildi

ASTANA. QazAqparat - Fýtboldan Premer-lıga komandalary arasyndaǵy el birinshiliginiń 5-týrynda qostanaılyq «Tobyl» óz alańynda elordalyq «Astanamen» kezdesti, dep habarlaıdy QazAqparat tilshisi.

Eki komanda týrnır kestesinde qatarlas keledi. Buǵan deıin qostanaılyq klýb úsh márte jeńip, bir márte teń tústi.

Al elordalyq komanda úsh márte qarsylastarynan basym túsip, bir márte jeńilistiń aşy dámin tatty.

Sondyqtan búgingi kezdesý tartysty ótetini belgili edi. Oıyn basynan komandalar gol soǵatyn múmkindikti izdedi.

Dese de, birinshi kezeńde tablodaǵy esepke ózgeris engen joq.

Ekinshi kezeńde de qos komandanyń belsendiligi baıqaldy. Oıynnyń 70-mınýtynda «Astana» shabýylshysy Marın Tomasov kózdegen nysanadan múlt ketken joq.

Osylaısha «Tobyl» qarsylasynan 0:1 esebimen ese jiberdi.

Endi atalǵan týrdy saǵat 21:00-de «Ordabasy» (Shymkent) men «Aqtóbe» komandalary túıindeıdi.

Al budan buryn «Qaırat» óz alańynda «Jetisýǵa» ese jibergen edi.

Eske salsaq, 8 sáýirde «Oqjetpes» «Aqsýdy» 3:0, «Maqtaral» «Kaspııdi» 3:1, «Qyzyljar» «Atyraýdy» 1:0, «Qaısar» «Shahterdi» 2:1 esebimen tize búktirdi.