Tobyldyń tasýy Qostanaı oblysyndaǵy jaǵdaıdy ýshyqtyrýy múmkin - Qazgıdromet
ASTANA. KAZINFORM – Qazgıdromet respýblıkalyq memlekettik kásipornynyń baspasóz hatshysy Alına Ismagýlova ortalyq kommýnıkatsııalar qyzmetinde ótken brıfıngide tasqynnyń kezekti tolqyny qaı óńirlerde bolatynyn aıtty.
«Sý deńgeıiniń kóterilýi Batys Qazaqstan, Aqmola, Qostanaı, Soltústik Qazaqstan jáne Shyǵys Qazaqstan oblystarynyń soltústik bóliginde jalǵasyp jatyr.
Sáýir aıynyń ekinshi onkúndiginde Esil ózeniniń Soltústik Qazaqstan oblysymen shekaralas bóliginde ózenniń basy men salalarynan qosymsha aǵyndardyń kelýine baılanysty tasqynnyń ekinshi tolqyny kútilýde. Nura ózeni basseıniniń Qaraǵandy oblysymen shekaralas bóliginde (Tselınograd, Qorǵaljyn aýdandary) sý qoımasynan jiberilgen jáne ózenniń bas jaǵynan erigen sýdyń jetýine baılanysty óńirde tasqyn jalǵasady», - dedi Qazgıdromet ókili.
Alına Ismagýlova Qostanaı oblysynda Tobyldyń deńgeıi áli kóterile túsýi múmkin ekenin atap ótti.
«Qostanaı oblysyndaǵy negizgi ylǵal kózi sanalatyn Tobyl ózeniniń (Jitiqara, Denısov, Qostanaı jáne Meńdiqara aýdandary) jáne Úı, Aıat, Toǵyzaq, Obaǵan sııaqty salalarynda muz sógilip, sý deńgeıi kóterilip jatyr. Sý deńgeıiniń aýytqýy 53 santımetrden +142 santımetrge deıin jetedi. Ózenniń shyǵys bóliginde de sý kóterilip otyr. Odan ári de kóterile túsedi degen boljam bar. Tipti qaýipti belgiden asyp ketýi múmkin. Bul sý deńgeıiniń artyp, ózenniń jazyqqa jaıylýyna ákeledi. Osylaısha Qostanaı oblysyndaǵy eldi mekenderdi, sharýashylyq qurylystaryn, ózen jaıylýy yqtımal ýchaskelerdegi jergilikti mańyzy bar joldardy sý basý qaýpi saqtalyp tur», - dedi ol.
Qazgıdromet mamany Abaı jáne Shyǵys Qazaqstan oblystarynyń basym bóliginde 8-10 sáýir kúnderi jaýyn-shashyn bolyp, kún jylyna túsetinin aıtty.
«Sonyń áserinen qar qarqyndy erip, seń júredi. Sý deńgeıi kúrt kóterilip, muz kepteledi, qar sýy jazyqqa jaıylady. Jaıylǵan sý avtojoldar men temir joldardy, turǵyn eldi mekender men sharýashylyq qurylystardy basýy múmkin», - dedi Alına Ismagýlova.
