«Tobyldan» keıin «Qaısar» da logotıpin jańartty

ASTANA. KAZINFORM — Qyzylordalyq «Qaısar» resmı túrde klýbtyń logotıpin jańartty. Bul jóninde komandanyń baspasóz qyzmeti málim etti.

— Sizderge jaǵymdy jańalyqty jarııalap, klýbymyzdyń logosy jańa dızaınmen jańarǵanyn habarlaımyz. Jańarǵan, jandanǵan logomyzda qasqyr sımvolymyz saqtalyp, zamanaýı stıl úılesim taýyp, klýbtyń rýhy, minezi jáne bolashaqqa degen umtylysy kórinis tapty. Bul ózgeris — damý jolyndaǵy kezekti qadamymyz, — dep jazylǵan habarlamada.

Bıyl komanda aldynda júldeli oryndardyń birine iligý jáne Qazaqstan kýbogyna qol sozý mindeti tur. Sondyqtan olar aldymen bas bapkerdi aýystyrdy. Bul qyzmetke qazaqstandyq maman Andreı Ferapontov keldi.

Komanda basshylyǵy ótken jylǵy quramnan qaqpashy Nurymjan Salaıdın, qorǵaýshy Temirlan Murzaǵalıev pen Ádilet Keńesbek, jartylaı qorǵaýshy Aıbol Ábiken men Dýman Nárzildaev, shabýylshy Nurdáýlet Aǵzambaevpen kelisimshart merzimin uzartty.

Sondaı-aq komanda quramyna shetelden jańadan qaqpashy Adam Kovach (Slovakııa), qorǵaýshy Nıkola Tsýtskıch (Serbııa), shabýylshy Tomas Djons (Chılı) keldi.

Oǵan qosa qazaqstandyq qorǵaýshy Nııaz Ydyrysov, jartylaı qorǵaýshy Saǵı Sovet, shabýylshy Alııar Muhamed aldaǵy maýsymda qyzylordalyq klýb sapynda oıyn kórsetedi.

Komanda búginde Birikken Arab ámirligindegi oqý-jattyǵý jıynyn bastap ketti. Onda 13 qańtarda BAÁ-niń «Al-Ittıfak», 19 qańtarda Ózbekstannyń «Dınamo Samarqand» klýbymen joldastyq oıyn ótkizedi.

Aıta keteıik, buǵan deıin «Qaısardan» keıin «Qyzyljar» klýbynyń jekemenshikke ótkenin jazdyq.