Tobyldaǵy bóget 3 500-ge deıin úıdi tasqynnan qorǵaıdy
ASTANA. KAZINFORM – Sý resýrstary jáne ırrıgatsııa mınıstri Qostanaı oblysyndaǵy iri sý qoımalarynyń sý tasqyny kezeńine daıyndyǵyn tekserdi.
Sý resýrstary jáne ırrıgatsııa mınıstri Nurjan Nurjigitov Qostanaı oblysyna jumys saparymen baryp, óńirdegi iri sý sharýashylyǵy nysandarynyń jumysymen jáne aldaǵy sý tasqyny kezeńine daıyndyǵymen tanysty.
Tobyl qalasynda Nurjan Nurjigitov Qostanaı oblysynyń ákimi Qumar Aqsaqalovpen birge eldi mekendi tasqyn sýdan qorǵaýǵa arnalǵan bógetke bardy. Byltyr nysanda kúrdeli jóndeý jumystary aıaqtalǵan. Jumys barysynda sý ótkizý qubyrlary ornatylyp, qubyrlar men beton alańdarǵa gıdrooqshaýlaý jumystary júrgizildi.
Jobany iske asyrý nátıjesinde Tobyl qalasyndaǵy 3 500-ge deıin turǵyn úıdi, áleýmettik nysandar men kásiporyndardy sý basýdan qorǵaýǵa múmkindik týdy.
Odan keıin mınıstr Rýdnyı qalasyndaǵy Qaratomar sý qoımasyna bardy. Syıymdylyǵy 586 mln tekshe metrge deıin jetetin bul nysan jergilikti turǵyndardy, sondaı-aq óńirdiń aýyl sharýashylyǵy men ónerkásibin sýmen qamtamasyz etedi.
Qazirgi ýaqytta sý qoımasyndaǵy sý kólemi onyń jalpy syıymdylyǵynyń 67%-yn quraıdy. Nysanda 391,2 mln tekshe metr sý jınalǵan. Bıyl sý qoımasynda sý qaqpalaryn jóndeý jumystary júrgizildi.
Qaratomar sý qoımasynda bolǵan kezde Nurjan Nurjigitov «Qazsýshar» RMK Qostanaı fılıalynyń mamandarymen kezdesti. Ol Sý resýrstary jáne ırrıgatsııa mınıstrligi kásiporyn qyzmetkerleriniń eńbek jaǵdaıyn jaqsartýǵa baǵyttalǵan sharalardy jyl saıyn júzege asyryp kele jatqanyn atap ótti.
- 2024 jyldan bastap «Qazsýshar» RMK qyzmetkerleriniń jalaqysyn jyl saıyn kóterip kelemiz. Eki jyl ishinde kásiporyndaǵy ortasha jalaqy mólsheri eki eseden astam ósti. Bıyl mehanızatorlardyń jalaqysy da kóterildi. Olardyń issapar shyǵyndary da óteledi. Budan bólek, gıdrotehnıkalyq qurylystardy salý, rekonstrýktsııalaý jáne tazalaý jumystaryn tıimdi júrgizý úshin barlyq fılıal jyl saıyn jańa arnaıy tehnıkamen qamtamasyz etiledi, – dedi Sý resýrstary jáne ırrıgatsııa mınıstri.
Lısakov qalasynda mınıstr sý sharýashylyǵy salasyndaǵy vedomstvoǵa qarasty Joǵarǵy Tobyl sý qoımasynyń jumysymen tanysty. Syıymdylyǵy 816,6 mln tekshe metrge deıin jetetin nysannyń qazirgi tolý deńgeıi 73%-dy quraıdy. Sý qoımasynda 592,2 mln tekshe metr sý jınalǵan. Bıyl munda jóndeý jumystary júrgizildi.
Joǵarǵy Tobyl sý qoımasyn aralaǵanda mınıstr «Qazsýshar» RMK-nyń jas mamandarymen áńgimelesip, elimizde sý salasynyń kadrlyq áleýetin arttyrý baǵytynda júzege asyrylyp jatqan sharalar týraly aıtty.
- Memleket basshysy sý salasynyń kadrlyq áleýetin damytýdyń mańyzyn birneshe ret atap ótti. Osy maqsatta biz salaǵa jas mamandardy tartý baǵytynda keshendi jumys júrgizip jatyrmyz. Máselen, sý mamandyqtary boıynsha oqýǵa túsetin talapkerlerge arnalǵan bilim berý granttarynyń sany artyp keledi. Sonymen qatar «Qazsýshar» RMK nysandarynda óndiristik tájirıbeden ótetin stýdentterdiń sany da kóbeıip jatyr. Budan bólek, Qytaı men Vengrııanyń joǵary oqý oryndarymen qos dıplomdy bilim berý baǵdarlamalary júzege asyrylýda. Mınıstrlik qurylǵannan beri qazaqstandyq sý salasynyń mamandary shetelde taǵylymdamadan ótip, biliktiligin arttyrý kýrstaryna qatysyp keledi. Qazirgi ýaqytta shetelde shamamen 500 adam bilim aldy, – dedi mınıstr Nurjan Nurjigitov.
Aıta ketelik Premer-mınıstr Soltústik Qazaqstandaǵy qorǵanys bógetteriniń jaǵdaıymen tanysqan edi.
