Tóbet pen tazyny tanytýǵa úles qosqandar Prezıdent alǵys hatymen marapattaldy
«Búgin men Memleket basshysy atynan tazy men tóbetti kóbeıtý, saqtaý jáne halyqaralyq arenada tanytý tapsyrmasyn oryndaýda eleýli jetistikterge qol jetkizgen azamattardy quttyqtaý qurmetine ıe boldym. Ózderińizge belgili, Qazaqstan kınologtar odaǵy halyqaralyq kınologııa federatsııasynyń (FCI) tolyqqandy múshesi boldy. Halyqaralyq federatsııaǵa múshe bolý úshin bizdiń kınologtar biraz ter tókti. Óz atymnan sizderdi tazy men tóbetti qazaqtyń baıyrǵy ıt tuqymy retinde halyqaralyq arenada tanytý jolyndaǵy alǵashqy jáne mańyzdy jeńisińizben quttyqtaımyn», - dedi Prezıdent Іs basqarýshysynyń orynbasary Sergeı Horoshýn saltanatty marapattaý sharasynda.
Memleket basshysynyń alǵys hatymen 18 adam marapattaldy.
Onyń qatarynda Qazaqstan kınologııa odaǵynyń basshylyǵy, Ekologııa jáne tabıǵı resýrstar mınıstrligi men Syrtqy ister mınıstrliginiń ókilderi jáne taǵy basqalar bar.
«Qazaqstannyń halyqaralyq kınologııa federatsııasynyń bas assambleıasyna qatysýshy el retindegi ótinishin 77 memlekettiń 72-i qoldady. Kópshilik daýsyna ıe bolý - elimizdiń bedeli jáne Syrtqy ister, Ekologııa mınıstrliginiń jáne Prezıdent Іs Basqarmasynyń kómegimen Qazaqstan kınologtar odaǵy júrgizgen eleýli jumystyń jemisi», - deıdi ol.
Prezıdenttiń alǵys mátini osyndaı:
«Siz Qazaqstan kınologtary odaǵynyń halyqaralyq kınologııalyq federatsııaǵa tolyq múshe bolýyna, halqymyz ejelden jeti qazynanyń birine balaǵan qumaı tazy men tarlan tóbetti saqtaý jáne ulǵaıtý isine eleýli úlesińizdi qosyp kelesiz. Jemisti ári nátıjeli eńbegińiz úshin sizge alǵysymdy bildiremin. Otbasyńyzǵa baq-bereke jáne jumysyńyzǵa tabys tileımin».
Aıta keteıik, tamyzda Jenevada halyqaralyq kınologııa federatsııasy (FCI) bas assambleıasynyń otyrysy aıasynda uıymdastyrylǵan World Dog Show-2023 ıtter kórmesine Qazaqstannan eki tazy qatysatyny aıtyldy.
Atalǵan kórmede qazaqtyń qos tazysy eń joǵarǵy tıtýldarǵa ıe boldy.
Eske sala ketsek, 2022 jyly Memleket basshysy Qasym-Jomart Toqaev tıisti organdarǵa ulttyq ıt tuqymdary – qazaqy tazy men tóbetti saqtaý jáne qalpyna keltirý, sondaı-aq ony tóltýma qazaqy ıt tuqymdary retinde halyqaralyq deńgeıde tanytýdy tapsyrǵan bolatyn.
Atalǵan máseleni QR Prezıdenti Іs basqarmasy óz qaraýyna alyp, júıeli sheshim qabyldaý úshin memlekettik organdarmen birlesken jumysqa kiristi.
