Tóbesine metall konstrýktor qulaǵan astanalyq áıel qaıtys boldy
NUR-SULTAN. QazAqparat – Elordada ústine metall konstrýktor qulaǵan áıel aýrýhanada dúnıe saldy. Bul málimetti Nur-Sultan qalasy qoǵamdyq densaýlyq saqtaý basqarmasynyń baspasóz qyzmeti rastady, dep habarlaıdy QazAqparat.
«Tóbesine metall konstrýktsııa qulaǵan elorda turǵyny qaıtys boldy. Qaıǵyly oqıǵa 22 qazanda bolǵan edi. Tótenshe jaǵdaıdan zardap shekken 1965 jyly týǵan áıel №2 qalalyq kópbeıindi aýrýhanaǵa óte aýyr jaǵdaıda tústi. Patsıentke mı operatsııasy jasaldy, ókinishke qaraı, oń dınamıka bermedi. Sondaı-aq, reanımatsııalyq sharalarǵa qaramastan, naýqasty qutqarý múmkin bolmady», - dep habarlandy basqarmadan.
Eske sala keteıik, 22 qazan kúni Nur-Sultanda kópqabatty úı shatyrynan metall konstrýktsııa qulady.
Oqys oqıǵa saldarynan 56 jastaǵy áıel túrli jaraqat alyp, jansaqtaý bólimine tústi.
Sondaı-aq, qalalyq polıtsııa departamenti bolǵan oqıǵaǵa qatysty QR Qylmystyq kodeksiniń 306-babyna sáıkes sotqa deıingi tergeý amaldarynyń bastalǵanyn habarlady.
Keıin elordanyń qoǵamdyq densaýlyq saqtaý basqarmasy naýqastyń óte aýyr halde ekenin jáne oǵan tıisti medıtsınalyq kómektiń kórsetilip jatqanyn málimdedi.
