Tóbelesten soń eki qulaǵy estimeı qalǵan aqtóbelik prokýratýradan kómek surady
Aqtóbe oblysy, Baıǵanın aýdanynyń turǵyny Aslan Sársenǵalıev orta mektepti bitirgen soń kolledjde bilim aldy. Keıin mamandyǵy boıynsha jumys tappaı, saýda oryndarynda júk tasýshy bolyp jumys istedi.
«Ulym qaladaǵy kafelerdiń birine baryp, keshki as ishedi. Janynda tanys qyzy boldy. Al kórshi ústelde polıtsııa qyzmetkerleri otyrǵan. Sol aralyqta eki jigit sózge kelip, keıin ulym Aslan syrtqa shyqqanda tártip saqshylary ony uryp, esinen tandyryp tastady. Bizge habar kesh berildi. Ol oblystyq jedel járdem aýrýhanasynda em qabyldady. Bir apta esin bilmeı jansaqtaý bóliminde jatty. Bas-mı jaraqatyn alǵan, murny synyp. Sol kúnnen bastap qulaǵy múlde estimeı qaldy. Qazir ol qaǵazǵa jazyp túsindiredi. Daýysy da kúnnen kúnge joǵalyp bara jatyr. Basy aýyrady, durys tamaq ishe almaıdy»,- dedi Qaırat Sársenǵalıev. Aýyr jaralanǵan Aslan Sársenǵalıev nevrolog, kóz, qulaq, muryn qýysy dárigerine qaralýy tıis. Biraq bul dárigerlerge barýǵa jas jigittiń qarjysy joq.
«Meniń qulaǵym estimeıdi. Jaq súıegimnen urǵan kezdes esimnen tanyp qalyp, birneshe kún jansaqtaý bóliminde jattym. Tergeý aıaqtalyp, is sotqa jetse degen tilegim bar»,- dedi Aslan Sársenǵalıev.
Sársenǵalıevter prokýratýraǵa aryz túsirip, kómek surady.
«Sársenǵalıevter bizge sáýir aıynda aryz jazdy. Aryz Aqtóbe oblystyq ІІD ishki qaýipsizdik basqarmasyna joldandy. Olar 6 qazanda taǵy aryz túsirdi. Aqtóbe oblysy prokýrorynyń orynbasary jeke qabyldaýyn ótkizdi. Sheshim qabyldanady», - dedi Aqtóbe oblysy prokýratýrasynyń aǵa prokýratýrasy Almat Qalymbetov.