Tóbeleskenderdi ajyratpaǵan polıtseı jumystan qýyldy
ALMATY. QazAqparat - Tóbeleskenderdi ajyratpaǵan almatylyq polıtseı jumystan qýyldy. Bul týraly qalalyq ІІD resmı ókili Saltanat Ázirbek habarlady.
Buǵan deıin Instagramdaǵy eap_kz pablıginde eki er adamnyń jol ortasynda judyryqtasa jónelgen vıdeosy jarııalanǵan bolatyn. Oqıǵa Altyn Orda bazarynyń mańynda bolǵan.
Tóbeleskenderdiń biri ortada jol qozǵalysyn rettep turǵan polıtseıdiń artyna tyǵyla bergen. Quqyq qorǵaýshy olardyń biri jerge qulap túskende ǵana aýyzsha eskertý jasap, joldan ketýin talap etti. Alaıda, ekeýi tóbelesin jalǵastyra bergen soń polıtsııa qyzmetkeri odan ári aralaspady.
Postty oqyǵan kópshilik polıtseıdiń áreketsizdigin qatty synǵa aldy.
Atalǵan oqıǵaǵa qatysty qalalyq ІІD túsinikteme berdi.
«Tártiptik komıssııanyń sheshimimen polıtsııa qyzmetkeri qyzmettik mindetin durys atqarmaǵany úshin, áreket etpegeni úshin, quqyq qorǵaý organdarynyń bedeline nuqsan keltirgeni úshin jumystan qýyldy. Al, tóbeleske baılanysty Naýryzbaı aýdandyq ІІB QR QK 293-baby boıynsha «buzaqylyq» deregimen sotqa deıingi tergeý amaldary júrip jatyr», - dedi ІІD resmı ókili S.Ázirbek.
Onyń aıtýynsha, tóbeleske jol qozǵalysynyń basqa qatysýshylary da beıtaraptyq tanytqan.
