«Tóbeleske qatysýǵa májbúr boldym»: Sherzat sotynda taǵy bir aıyptalýshy jaýap berdi

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.

Sotta aıyptalýshy Nurbol Toqtaýbaevtan jaýap alyndy. Ol 2024 jyly 3-inen 4-shi qazanǵa qaraǵan túni oqıǵa qalaı órbigenin aıtty.

— Men «Eıforııa» kafesinde tanystarymmen birge otyrdym. 23:30–da tanysym Darhan Áskentaı habarlasyp, «Qamajaı» dúkenine kelýimdi ótindi. «Meni bireý uryp ketti» dedi. Men ózim bir bótelke syra iship alǵandyqtan Dýman Ysqaqqa rýlge otyrýǵa ótinish jasadym. Dúkenge bardym, D.Áskentaı syrtta betinen qan aǵyp turdy. Odan mán-jaıdy suraǵanda «dúkenshiniń balasy uryp tastady» dep qysqasha aıtty. Sosyn dúkenge kirip Qarjaýbaıdyń ózinen mán-jaıdy suradym. Ol «dosyń aqsha tólemedi», birese «ózim urdym», birese «ulym urdy» dedi. Men artyǵymen 1,5 myń teńge tólep berdim. Sosyn dosym úshin keshirim surap, Darhan, men, Dýman úsheýmiz ketip qaldyq, — dedi ol.

Sottalýshynyń aıtýynsha, bul oqıǵalardan keıin Nurbol Toqtaýbaev Darhan Áskentaımen kólikte sóılesip, dúkenge qaıta barýǵa sheshim qabyldaǵan.

— Jolda Darhan aqsha tólegenin aıtty. Kıkiljiń aqsha týraly bolǵannan keıin men qaıta barýǵa sheshim qabyldadym. Tólegen aqshamdy qaıtaryp alý úshin jáne Darhan Áskentaı aqsha tólegenin rastaǵym keldi. Qaıtadan bardyq, biraq oǵan Qarjaýbaı qarsy boldy. «Menimen shyq, menimen shyqpasań, balammen shyq» dedi. Pyshaq taqady. Men ózimdi «hýtorskıı» dep tanystyrǵan joqpyn. Nurqanat telefonmen bireýlerdi shaqyryp jatty. Úlken-úlken 6-7 shaqty bala keldi. Shyńǵys (Belǵojaev) degen bala bar, óz týǵan baýyrymda (Azamat Toqtaýbaev) telefon bolmaǵandyqtan Chınaǵa habarlasyp, sonyń telefony arqyly óz inimdi shaqyrdym. Sonymen balalar kelip, tóbeles bastalyp ketti. Men dúken ishinde turǵam. Myltyq atyldy, Nurqanat birinshisin aspanǵa, ekinshisin aıaǵymyzǵa atty. Ózim bir-eki ret aıaǵymdy sermep, Nurqanatty tepkenimdi rastaımyn, — dedi ol.

Qamajaı dúkeniniń syrtyndaǵy beınekamera túsirgen beınejazbaǵa baılanysty «men sabyrǵa shaqyrýmen júrdim» dep pikir bildirdi.

Sonymen qatar kýáger túsirgen Sherzat pen Nurqanat soqqyǵa jyǵylǵan beınajazbadaǵy óz is-áreketine Nurbol Toqtaýbaev túsinikteme berdi.

— Myltyq atylǵannan keıin abdyrap qaldyq. Tóbeleske kirýge májbúr boldym. Balalar baryp jatqannan keıin men de artynan bardym. Sosyn Nurqanatty bir-eki ret teptim. Sherzat jaqqa barǵan joqpyn, arasy 4-5 metrdeı boldy, — dedi sottalýshy.

Advokat suraǵyna jaýap bergen Nurbol Toqtaýbaev Sherzattyń 16 jasta ekenin bilmegenin jáne onyń anasy Gúlbara Bıshimbıevanyń qolynan ustap, toqtatý áreketi bolmaǵanyn atap ótti.

Buǵan deıin sotta 4 qazan kúni bolǵan janjal beınejazbasy jarııalandy.

Ótken sot otyrysynda aıyptalýshy Darhan Áskentaıdan jaýap alyndy.

Sot barysynda sottalýshylardyń advokattary prokýrordy aýystyrýdy ótindi. Biraq sýdıa prokýrordy aýystyrýdan bas tartty.

Sonymen qatar sotta dúken kamerasyna túsken oqıǵanyń tolyq beınejazbasy kórsetildi.

Alǵashqy sot otyrysynda prokýror oqıǵanyń tolyq hronologııasyn baıandady.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

2024 jyldyń jeltoqsan aıynda Talǵar mańynda Sherzat aǵasynyń denesi tabyldy.