Tóbeden sý aǵyp tur: ShQO-da kópbalaly otbasylarǵa berilgen úılerde aqaý bar
Shyǵys Qazaqstan oblysy Zaısan qalasynda kópbalaly otbasylardyń «Baspanaly boldyq!» degen qýanyshy uzaqqa sozylmady. Olar úıleriniń tóbelerinen aqqan sýdy shelektep shyǵaryp, ábden áýre-sarsańǵa túsip júr, dep habarlaıdy QazAqparat tilshisi.
Bul týraly byltyr da jazǵan edik. Sol kezde ákimdik aralasyp, merdiger kompanııa jumysshylary úılerdiń tóbesindegi sý aqqan jerlerge kóbik quıyp, máseleni sheshkendeı bolǵan. Biraq bıyl kúz túse salysymen úılerdiń tóbesinen taǵy da sý sorǵalady.
«Ótken aptada birneshe kún boıy toqtaýsyz jańbyr jaýdy. Sonyń saldarynan 10 shaqty úıdiń tóbesinen sý aqty. Sýdy qaıta-qaıta shelektep shyǵarýǵa májbúr boldyq. Byltyr bastalǵan bul másele bıyl taǵy jalǵasty. Jalpy, úıler áý basta sapasyz salynǵan. Tóbesi tym juqa. Tipti jeldiń gýili estiledi», - deıdi kópbalaly ana Ásemgúl Baýyrjanqyzy.
Bul úıler kópbalaly otbasylarǵa birjola berilmegen. Olar munda jaldamaly páter retinde turyp jatyr. Osy rette, aýdan ákimdigine habarlasyp kórdik. Bul 18 qos páterli, ıaǵnı 36 úı «Nurly Jer» baǵdarlamasy aıasynda jeke qurylysshylarmen jasalǵan memorandým negizinde salynyp, 2020 jyly kommýnaldyq menshikke satyp alynǵan.
«Qarajat oblystyq bıýdjet esebinen bólingen. Úıler memlekettik turǵyn úı qorynan kópbalaly otbasylarǵa jalǵa berilgen. Jaldaý quny páterdiń aýdanyna baılanysty aıyna 18 000-20 000 teńge aralyǵynda. Úılerdi birneshe jeke qurylysshy saldy. Qurylys jumystary aıaqtalǵan soń turǵyn úılerdi arnaıy komıssııa qabyldap alǵan joq, sebebi bul úıler jeke qurylysshylar tarapynan salynǵandyqtan, qoldanysqa da ózderi engizdi. Úıdiń sapasy qanaǵattanarlyq jaǵdaıda boldy», - degen jaýap aldyq.
Al, úılerdi komıssııa qabyldap almaǵany qanshalyqty zańdy? Muny anyqtaý úshin ShQO Qurylys, energetıka jáne TÚKSh basqarmasy basshysynyń orynbasary Azamat Ahmambetovke jolyqtyq.
«Bul kópqabatty emes, jer úıler bolǵandyqtan, ony komıssııa qabyldap almaıdy. Úılerdi jeke kompanııa óz qarajatyna salǵan, al ákimdik odan daıyn úılerdi satyp alǵan, ıaǵnı eshqandaı zań buzýshylyq joq. Biraq osy 2023 jyldan bastap zańǵa ózgeris engizildi. Endi «Bir qabatty Shyǵys» baǵdarlamasymen salynǵan jer úılerdi satyp almas buryn Shyǵys Qazaqstan oblysynyń Memlekettik sáýlet-qurylys baqylaýy basqarmasynyń qyzmetkerleri onyń sapasyna tekserý júrgizedi. Al Zaısan qalasynda 2020 jyly bul úılerdi salǵanda ondaı talap bolmady», - dep túsindirdi ol.
Aldyn ala boljam boıynsha qurylys jumystary kezinde kemshilikter ketken, sol sebepti de 11 úıdiń tóbesinen sý aǵyp tur.
«Kemshilikter boıynsha merdiger mekemelerge hat joldanady. Eger olardyń tarapynan esh áreket bolmasa, sotqa talap aryz beriledi. Zań boıynsha tóbesinen sý aqqan úıler apattyq jaǵdaıda dep tanylmaıdy. Úıler turǵyndardyń qystaı otyryp shyǵýyna jaramdy», - delingen ákimdik jaýabynda.
