Toba Ótepbaev elordadaǵy jas aqyndar aıtysynyń jeńimpazy atandy
Astana qalasy Tilderdi damytý basqarmasynyń muryndyq bolýymen búgin «Jastar» saraıynda «Táýelsizdigim - teńdigim, Egemendigim - eldigim» atty jas aqyndar aıtysy ótti. Oǵan elimizdiń Almaty, Arqalyq, Semeı, Qyzylorda, Pavlodar, Shymkent qalalary men Torǵaı, Shyǵys Qazaqstan óńirinen 9 aıtysker qatysty.
Aqyndardyń ataly sózi Táýelsizdik, Alash, Rýhanı jańǵyrý, týǵan jer, til taqyryptaryna arqaý boldy.
«Bul jas aqyndar aıtysy sonymen qatar Astana qalasynyń 20 jyldyǵynada arnalyp otyr. Aqyndar Táýelsizdigimizdi, Astana qalasynyń keshegisi men búgininiń, bolashaǵyn, álemniń ózge de astanalarymen terezesiniń tendigin jyrlaıdy. Mysaly keshe 250-260 myń halyq bolsa, búgingi kúni bir mıllıonǵa jetýi. Elimizdiń, Astanamyzdyń ekonomıkasynyń, biliminiń, ǵylymynyń jáne mádenıetiniń ósý jaǵdaılary jyrlanady», - dep atap ótti Astana qalasy tilderdi damytý basqarmasynyń basshysy Tileýǵalı Qyshqashbaev.
Aıtysty ótkizýdiń maqsaty - aqyndardyń óreli óneri, órnekti sózderi arqyly Táýelsizdik murattary men qundylyqtaryn nasıhattaý; el egemendigi jolyndaǵy Elbasynyń atqarǵan ıgi isterin ulyqtaý; «Rýhanı jańǵyrý» baǵdarlamasynyń mańyzdylyǵyn pash etý; óskeleń urpaqty otansúıgishtikke tárbıelep, olardyń tanym-talǵamyn ult rýhanııatyna baǵyttaý; qazaqtyń tól óneri, qudyretti sózi arqyly memlekettik tildiń mereıin arttyrý, qoldanys aıasyn keńeıtý.
Qazylar alqasynyń sheshimimen І oryn Toba Ótepbaevqa (Arqalyq), ІІ oryn Aıan Nııazbekke (OQO), ІІІ oryn Nurqanat Qaıratqa (Pavlodar oblysy) berildi. Al Aıbar Raǵatov (Qostanaı oblysy) bolsa arnaıy júlde ıegeri atandy. Jeńimpazdar baǵaly syılyqtarmen jáne arnaıy dıplomdarmen marapattaldy.
Qalǵan barlyq qatysýshylarǵa Astana qalasynyń ákimi Áset Isekeshevtiń atynan Alǵys hat jáne 50 myń teńge qarjylaı syılyq berildi.
