Tinderdi qalpyna keltirýdiń jańa tásilderi: Astanada halyqaralyq forým ótti
ASTANA. KAZINFORM – Astanada «Plazmanyń mádenı kody» halyqaralyq ıntellektýaldyq forýmy ótti. Іs-sharada Qazaqstan men shetelden kelgen mamandar regeneratıvti medıtsına, plazmoterapııa, jasýshalyq tehnologııalar jáne tinderdi qalpyna keltirýdiń zamanaýı tásilderin talqylady.
Forýmǵa Qazaqstan, Frantsııa, Germanııa, Reseı, Ózbekstan, Indonezııa jáne basqa elderden 300-den astam qatysýshy men 30-dan astam halyqaralyq sarapshy jınaldy. Kosmetologııa, hırýrgııa, stomatologııa, oftalmologııa, gınekologııa jáne regeneratıvti medıtsına salasynyń ókilderi sońǵy tájirıbelerimen bólisti.
Mamandardyń aıtýynsha, qazirgi medıtsınada aýrýdy emdeýmen qatar aǵzanyń tabıǵı qalpyna kelý múmkindigin kúsheıtýge degen qyzyǵýshylyq artyp keledi. Osyǵan baılanysty forým baǵdarlamasy tinderdiń regeneratsııasy, plazmoterapııa, jasýshalyq tehnologııalar jáne ońaltý baǵyttaryna arnaldy.
Plazmoterapııanyń múmkindigi qandaı?
Forýmda sóz sóılegen hırýrg ári regeneratıvti medıtsına mamany Anastasııa Antonova sońǵy jyldary kosmetologııadaǵy eń ózekti máselelerdiń biri – protsedýradan keıingi ońaltý kezeńi ekenin aıtty.
Onyń sózinshe, patsıentter kóbine tez nátıje beretin ádisterdi tańdaıdy. Alaıda kez kelgen apparattyq nemese ınektsııalyq aralasýdan keıin aǵzada qalpyna kelý úderisi bastalady. Sońǵy nátıjeniń sapasy da kóbine osy kezeńge baılanysty.
– Basty maqsat – tek áser etý emes, aǵzanyń óz qalpyna kelý múmkindigin qoldaý. Sondyqtan plazmoterapııaǵa qyzyǵýshylyq artyp keledi. Ol tinderdiń saýyǵý protsesin qoldap, ońaltý kezeńin jeńildetýge múmkindik beredi, – dedi maman.
Onyń aıtýynsha, qazirgi regeneratıvti medıtsına syrtqy ózgeristerdi túzetýden góri aǵzanyń tabıǵı resýrstaryn tıimdi paıdalanýǵa kóbirek kóńil bóle bastady.
Áıelder densaýlyǵyndaǵy jańa baǵyttar
Forým barysynda áıelder densaýlyǵy máseleleri de keńinen talqylandy.
Qazaqstandaǵy ıntımdik reabılıtatsııa jáne estetıkalyq gınekologııa bólimshesiniń meńgerýshisi Indıra Haırýsheva medıtsınada túrli apparattyq tehnologııalar qarqyndy damyp jatqanyn atap ótti. Degenmen, onyń pikirinshe, kez kelgen protsedýranyń tıimdiligi tinderdiń bastapqy jaǵdaıyna tikeleı baılanysty.
– Lazerlik, radıotolqyndy jáne ýltradybystyq tehnologııalar keńinen qoldanylady. Biraq tinderdi yntalandyrmas buryn olardyń qalpyna kelý áleýetin kúsheıtý mańyzdy. Plazmanyń artyqshylyǵy – onyń quramyndaǵy komponentter aǵzaǵa jat emes jáne tabıǵı qalpyna kelý úderisterine qatysady, – dedi ol.
Maman ásirese áıelder densaýlyǵynda tinderdiń qurylymy men qyzmetin saqtaý mańyzdy ekenin atap ótti. Onyń pikirinshe, regeneratıvti medıtsınadaǵy jańa tásilder ómir sapasyn jaqsartýǵa múmkindik beredi.
Estetıkalyq medıtsınadaǵy jańa kózqaras
Estetıkalyq medıtsına mamany Natalıa Aleksandrova óz baıandamasynda plazma negizindegi hattamalardy jasqa baılanysty ózgeristermen jumys isteýde qoldaný tájirıbesin usyndy.
Ol birneshe kezeńnen turatyn plazmoterapııa kýrsynan ótken 68 jastaǵy patsıenttiń klınıkalyq jaǵdaıyn tanystyryp, regeneratıvti tásilderdiń múmkindikterine toqtaldy.
– Qazirgi estetıkalyq medıtsınada másele tek syrtqy ózgeristerdi túzetýde emes. Basty mindet – tinderdiń qalpyna kelý áleýetin saqtaý jáne qoldaý. Sondyqtan biz aǵzany tutas júıe retinde qarastyrýǵa kóbirek mán bere bastadyq, – dedi maman.
Onyń pikirinshe, jasqa baılanysty ózgeristermen kúreste tek jekelegen belgilerdi túzetý jetkiliksiz. Nátıje turaqty bolýy úshin tinderdiń ishki resýrstaryn da eskerý qajet.
Medıtsına qaı baǵytqa bet alyp barady?
Forým aıasynda plazmoterapııa men lazerlik tehnologııalardy ushtastyrý, tyrtyqtardy emdeý, hırýrgııalyq aralasýdan keıingi ońaltý, reprodýktıvti densaýlyqty qalpyna keltirý, jasýshalyq tehnologııalar jáne bıomedıtsına máseleleri boıynsha baıandamalar jasaldy.
Uıymdastyrýshylardyń aıtýynsha, is-sharanyń basty ereksheligi – tájirıbelik medıtsınaǵa basymdyq berilýi. Baǵdarlamada naqty klınıkalyq jaǵdaılar taldanyp, mamandar arasynda ashyq pikir almasýǵa múmkindik jasaldy.
Sonymen qatar qatysýshylar úshin praktıkalyq vorkshoptar uıymdastyrylyp, aýtologııalyq plazmanyń zamanaýı túrleri, olardy qoldaný hattamalary jáne tinderdiń regeneratsııa mehanızmderi tanystyryldy.
Forýmda kóterilgen taqyryptardyń ártúrli bolǵanyna qaramastan, olardy biriktiretin ortaq ıdeıa bar. Ol – aǵzanyń tabıǵı qalpyna kelý áleýetin tıimdi paıdalaný.
Mamandardyń pikirinshe, regeneratıvti medıtsına aldaǵy jyldary densaýlyq saqtaý salasyndaǵy mańyzdy baǵyttardyń birine aınalýy múmkin. Al plazmoterapııa túrli medıtsınalyq salalarda qoldanylyp jatqan, áleýeti joǵary quraldardyń biri retinde qarastyrylady.
Sondyqtan mundaı forýmdar dárigerlerdiń tájirıbe almasýyna ǵana emes, medıtsınanyń bolashaq damý baǵyttaryn aıqyndaýǵa da múmkindik beredi.
Aıta keteıik, buǵan deıin Densaýlyq saqtaý mınıstrligi plastıkalyq hırýrgııa klınıkalaryna lıtsenzııa berý tártibin kúsheıtý máselesi qaralyp jatqanyn habarlaǵan edi. Usynysqa sáıkes, plastıkalyq hırýrgııa qyzmetin kórsetetin medıtsınalyq uıymdardyń lıtsenzııasy bes jyl saıyn qaıta baǵalanýy múmkin.
