TMU mıssııasy daýys berý ýchaskeleriniń jumysyna qatysty málimdeme jasady
ASTANA. KAZINFORM — Daýys berý ýchaskelerinde turǵyndarǵa qolaıly jaǵdaı jasaldy. Bul týraly Túrki memleketteriniń uıymy Bas hatshysynyń orynbasary Omer Kodjaman málim etti.
— Qazaqstandaǵy reforma aıasynda eleýli ózgerister qamtylǵan. Referendým kúni Túrki memleketteri uıymy mıssııasy úsh topqa bólinip, Astana qalasyndaǵy 31 daýys berý ýchaskesinde monıtorıng júrgizdi. Mıssııa ákimshilik nemese quqyq qorǵaý organdarynyń daýys berý ýchaskeleriniń jumysyna aralasýyn baıqamady. Adamdar óz erkimen kelip, daýys berýine barlyq qolaıly jaǵdaı jasaldy, — dedi Omer Kodjaman elordada ótken baspasóz máslıhatynda.
Onyń aıtýynsha, mıssııa eshqandaı mańyzdy zań buzý derekteri men sáıkessizdikterdi baıqamady. Daýys berý ýchaskelerinde halyqaralyq jáne jergilikti baıqaýshylarǵa barlyq jaǵdaı jasalyp, ashyqtyq tártibi saqtaldy.
— Referendým komıssııalarynda qajet aqparat pen tehnıkalyq qural-jabdyqtar jetkilikti boldy. Sondaı-aq mıssııa daýys berý ýchaskelerinde eshqandaı ruqsat etilmegen jáne zańsyz materıaldardy baıqamady. Múgedektigi bar adamdar da ózderiniń konstıtýtsııalyq quqyǵyn júzege asyra aldy. TMU mıssııasy aqparattyń durys taralýy referendýmnyń sátti ótýine yqpal etti degen qorytyndyǵa keldi. Túrki memleketteri uıymynyń mıssııasy Qazaqstan Respýblıkasynda referendýmnyń ashyq ótkenine kóz jetkizdi. Barlyǵy halyqaralyq standarttarǵa jáne eldiń ulttyq zańnamasyna sáıkes ótkenin málimdeımiz, — dedi Omer Kodjaman.
Aıta keteıik, 15 naýryzda Qazaqstanda jańa Ata Zańnyń jobasy boıynsha jalpyulttyq referendým ótti.
Bıyl 12 aqpanda Qazaqstan Respýblıkasynyń jańa Ata Zańynyń qorytyndy jobasy jarııalandy.
Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy.
Respýblıkalyq referendýmda berilgen bıýlletende «Jobasy buqaralyq aqparat quraldarynda 2026 jylǵy 12 aqpanda jarııalanǵan Qazaqstan Respýblıkasynyń jańa Konstıtýtsııasyn qabyldaısyz ba?» degen saýal qoıyldy.
16 naýryzda Ortalyq referendým komıssııasy daýys berýdiń aldyn ala nátıjelerin jarııalady.
