TMU: Qazaqstan Syrtqy ister mınıstri IT mamandarynyń forýmyn ótkizýdi usyndy
ASTANA. KAZINFORM — QR Syrtqy ister mınıstri Ermek Kósherbaev Túrki memleketteri uıymy sammıti aıasynda Ázerbaıjan Respýblıkasy men Majarstannyń syrtqy ister mınıstrleri Djeıhýn Baıramov jáne Peter Sıııartomen ekijaqty kezdesý ótkizdi. Bul týraly vedomstvonyń baspasóz qyzmeti habarlady.
Ázerbaıjan Syrtqy ister mınıstrimen kezdesý barysynda ekijaqty yntymaqtastyq pen ony odan ári damytý perspektıvalary, sondaı-aq bıik jáne joǵary deńgeıde qol jetkizilgen ýaǵdalastyqtardy júzege asyrý barysy talqylandy.
Ázerbaıjan Respýblıkasynyń Prezıdenti Ilham Álıevtiń Qazaqstan Respýblıkasyna aldaǵy memlekettik saparyna daıyndyq máselelerine erekshe nazar aýdaryldy.
Mınıstr sapar barysynda tsıfrlandyrý salasyndaǵy Astana men Baký baılanystaryna qosymsha serpin berý úshin IT mamandarynyń forýmyn ótkizýdi usyndy.
— Majarstan syrtqy saıası vedomstvosynyń basshysymen Qazaqstan Prezıdenti Qasym-Jomart Toqaevtyń 2024 jylǵy qarashadaǵy Majarstanǵa memlekettik saparynyń, sondaı-aq Majarstan Prezıdenti Tamash Shýıok pen Parlament Spıkeri Laslo Keverdiń 2025 jylǵy qyrkúıek-qazanda Qazaqstanǵa jasaǵan saparlarynyń qorytyndysy boıynsha qol jetkizilgen ýaǵdalastyqtardy iske asyrý barysy talqylandy, — delingen aqparatta.
Taraptar aýyl sharýashylyǵy, energetıka, densaýlyq saqtaý jáne qarjy salalaryndaǵy birlesken jobalardy keńeıtý máselelerine toqtaldy. Joǵary deńgeıdegi belsendi saıası dıalog eki el arasyndaǵy senimdi nyǵaıtýǵa jáne strategııalyq ózara is-qımyldy odan ári tereńdetýge yqpal etetini atalyp ótti.
Qazaqstannyń IT jáne tsıfrlandyrý salasyndaǵy jetistikterin eskere otyryp, E. Kósherbaev elder arasyndaǵy seriktestikti osy perspektıvalyq baǵytta, onyń ishinde «Alem.AI» halyqaralyq jasandy ıntellekt ortalyǵynyń bazasynda keńeıtýdi usyndy.
Sonymen qatar óńirlik jáne jahandyq kún tártibindegi ózekti máseleler talqylandy. Taraptar kópjaqty qurylymdar sheńberinde odan ári tyǵyz yntymaqtastyqqa beıildiligin rastady.
Aıta keteıik, Qyrǵyzstan TMU tóraǵalyǵyn Ázerbaıjanǵa tapsyrdy.