TMU-ǵa múshe memleketter arasyndaǵy taýar aınalymy artyp keledi – Qanat Sharlapaev
ASTANA. KAZINFORM – Endi saýda qatynasynan óndiristegi seriktestikke kóshý mańyzdy. Bul jóninde Túrki memleketteriniń saýda-óndiristik palatalary odaǵynyń tóraǵasy, «Atameken» QR UKP prezıdıým tóraǵasy – basqarma tóraǵasy Qanat Sharlapaev málimdedi.
Ol «Túrki memleketteri uıymy elderiniń ekonomıkalyq ıntegratsııasy jáne yntymaqtastyǵy: óndiris, agroónerkásiptik keshen, logıstıka jáne tsıfrovızatsııa salalaryndaǵy jańa múmkindikter» bıznes forýmynda atalǵan taqyrypqa toqtaldy.
– Elderimizdiń arasyndaǵy taýar aınalymy artyp kele jatyr. Biraq shıkizat jáne daıyn ónim saýdasymen shektelmeýimiz kerek. Mysaly, Qazaqstan jáne TMU-ǵa múshe memleketter arasyndaǵy taýar aınalymy bıyl qańtar-aqpan aılarynda 2,4 mlrd AQSh dollaryna jetti. Bul kórsetkish ótken jylǵy osy merzimnen 40%-ǵa joǵary, - dedi Qanat Sharlapaev.
Onyń sózinshe, endi túrki elderi saýda qatynasynan birlesken óndiriske kóshýi qajet. Óıtkeni, óndiristegi seriktestik ekonomıka ıntegratsııasyna oń áser etedi.
– Astana Hub tárizdi IT bastamalar tıimdiligin dáleldedi. Biraq shyn mánindegi ıntegratsııa túrki memleketteri arasynda biryńǵaı tsıfrlyq keńistik qurǵanymyzda ǵana bastalady, - dedi Túrki memleketteriniń saýda-óndiristik palatalary odaǵynyń tóraǵasy.
Onyń málimdeýinshe, TMU aýmaǵynda senimdi jetkizýshilerdiń biryńǵaı tizilimin qalyptastyrǵan jón. Ol óndirýshiler men tutynýshylar arasynda araqashyqtyqty qysqartýǵa, ashyqtyqty qamtamasyz etýge jáne jetkizý ýaqytyn jedeldetýge múmkindik beredi.
Aıta keteıik, buǵan deıin Qanat Sharlapaevtyń Túrki ıntegratsııasynyń XXI ǵasyrdaǵy modelin qalyptastyrý jónindegi málimdemesin jarııalaǵanbyz.
