TMU-ǵa múshe elder ǵarysh agenttikteri basshylarynyń kelesi kezdesýi Qazaqstanda ótpek
TAShKENT. KAZINFORM – Túrki memleketteri uıymynyń Bas hatshysy Kýbanychbek Omýralıev ǵarysh agenttikteri basshylarynyń 2027 jyly ótetin kezdesýin Qazaqstanda uıymdastyrýdy usyndy, dep habarlaıdy Kazinform agenttiginiń Tashkenttegi menshikti tilshisi.
Bul týraly ol Tashkentte ótken Space Technology Conference konferentsııasy barysynda málim etti.
- Men qazaq tarapynan 2027 jyly ǵarysh agenttikteri basshylarynyń kelesi, altynshy kezdesýin ótkizý múmkindigin qarastyrýdy suraımyn. Ózderińiz biletindeı, resmı Astana bizdi byltyr qabyldaýy tıis bolǵan. Alaıda, 2025 jyly Ázerbaıjan, al bıyl Ózbekstan bul is-sharany ózderiniń aýmaǵynda ótkizýdi ótindi. Sondyqtan kelesi jyly bizdiń kezdesý Qazaqstanda ótedi dep senemin, - dedi Kýbanychbek Omýralıev.
Іs-shara aıasynda Kazinform tilshisine suhbat bergen QR Aeroǵarysh komıteti tóraǵasynyń orynbasary Qýandyq Shúlenbaev atalǵan aqparatty rastady.
- Konferentsııa jyl saıyn ótkiziledi. Endi ony Qazaqstanda uıymdastyrý josparlanyp otyr. Sondaı-aq, bizde 7-9 qyrkúıek aralǵynda Astana qalasynda Space Days Kazakhstan is-sharasy bolady, - dedi Qýandyq Shúlenbaev.
Eske salaıyq, atalǵan konferentsııa barysynda 2027 jyly ǵaryshqa shyǵarylatyn túrki elderiniń birlesken spýtnıgi tanystyryldy.
Munymen birge jaqynda kosmosqa attanatyn tuńǵysh ózbek ǵaryshkerine qoıylatyn talaptar jarııalandy.
Qosa ketsek, bıyl Ózbekstan men Qytaı ǵaryshqa Jerdi qashyqtyqtan zondtaıtyn spýtnık ushyrýdy josparlap otyr.
Sondaı-aq, Ózbekstan 2028 jyly «Mirzo Ulug’bek» spýtnıgin ǵarysh keńistigine shyǵarady.
