TMU elderiniń saılaý komıssııalary dıpfeıkpen kúres jaıyn talqylady
ASTANA. KAZINFORM – Búgin elordada Túrki memleketteri uıymyna múshe elderdiń Ortalyq saılaý komıssııalary Konsýltatıvtik platformasynyń jumys otyrysy ótti.
Alqaly jıynǵa Qazaqstan Ortalyq saılaý komıssııasynyń tóraǵasy Nurlan Ábdirov, Ázerbaıjan Ortalyq saılaý komıssııasynyń tóraǵasy Mazahır Panahov, Qyrǵyzstan Ortalyq saılaý jáne referendým ótkizý komıssııasynyń tóraǵasy Tynychtyk Shaınazarov, Túrkııa Joǵary saılaý keńesiniń tóraǵasy Serdar Mýtta, Ózbekstan Ortalyq saılaý komıssııasynyń tóraǵasy Zaınıddın Nızamhodjaev, Túrki memleketteri uıymy Bas hatshysynyń orynbasary, TMU-nyń saılaýdaǵy baıqaýshylar mıssııasynyń basshysy Nýrý Alekper Ogly Gýlıev, Túrikmenstan OSK tóraǵasynyń orynbasary, sondaı-aq Túrki memleketteri uıymynyń, TÚRK PA-nyń jáne Túrki akademııasynyń ókilderi qatysty.
Otyrysty ashqan OSK tóraǵasy Nurlan Ábdirov túrki memleketteriniń saılaý organdary arasyndaǵy tájirıbe almasýdy odan ári jalǵastyrýdyń mańyzdylyǵyn atap ótti.
Ortaq eńbek
Kezdesýdiń basty oqıǵalarynyń biri «TMU-ǵa múshe memleketterdiń saılaý júıeleri» atty ujymdyq monografııanyń tusaýkeseri boldy. Saltanatty rásim barysynda Nurlan Ábdirov bul basylymnyń platformaǵa qatysýshy barlyq memleket ókilderiniń birlesken jumysynyń nátıjesi ekenin atap ótti.
- Bul tek Qazaqstannyń jumysy nemese jetistigi emes. Bul ortaq jumysymyzdyń nátıjesi ekenin atap ótkim keledi. Eger kitaptyń muqabasyna nazar aýdarsańyzdar, munda redaktsııalyq alqanyń basshylary — bizdiń qurmetti tóraǵalarymyz kórsetilgen. Sondyqtan bul — bizdiń ortaq eńbegimiz», — dep atap ótti Nurlan Ábdirov.
Kezdesýge qatysýshylardyń aıtýynsha, jınaq TMU-ǵa múshe memleketterdiń saılaý júıeleri týraly jan-jaqty túsinik qalyptastyryp, túrli tásilder men kózqarastardy biriktiredi. Olardyń baǵalaýynsha, saılaý salasyndaǵy zamanaýı úrdister men ınnovatsııalardy qosa alǵanda, qarastyrylyp otyrǵan máselelerdiń ózektiligi erekshe mańyzǵa ıe.
Qatysýshylar monografııany aldaǵy ǵylymı zertteýlerge, elektoraldyq mádenıetti arttyrýǵa, bilim berý baǵdarlamalaryn ázirleýge jáne saılaý quqyǵy salasyndaǵy halyqaralyq yntymaqtastyqty damytýǵa paıdaly baza bola alatynyn atap ótti.
Saılaý naýqany kezeńindegi dıpfeıkter qaýpi
Otyrys barysynda saılaý kezeńinde dıpfeıkterge, jalǵan aqparattar men aqparatty manıpýlıatsııalaýdyń ózge de túrlerine qarsy is-qımyl máselelerine erekshe nazar aýdaryldy.
Qatysýshylar jasandy ıntellekt tehnologııalarynyń qarqyndy damýy saılaý protsesteri úshin jańa syn-qaterler týyndatyp otyrǵanyn atap ótti. Búginde jalǵan nemese manıpýlıatsııalyq kontent burynǵyǵa qaraǵanda áldeqaıda jyldam jasalyp, taralýy múmkin.
- Dıpfeıkter kandıdattardyń beınesin burmalap, olarǵa jalǵan málimdemelerdi telip, qoǵamdyq pikirge yqpal etýi jáne túptep kelgende qoǵamnyń saılaý ınstıtýttaryna degen senimin álsiretýi múmkin, — dedi Túrki memleketteri uıymy Bas hatshysynyń orynbasary, TMU-nyń saılaýdaǵy baıqaýshylar mıssııasynyń basshysy Nýrý Alekper Ogly Gýlıev.
Ol sondaı-aq Konsýltatıvtik platforma aıasynda qurylǵan dıpfeıkterdiń saılaý protsesine yqpaly máseleleri jónindegi jumys tobynyń qyzmetine erekshe toqtaldy. Jumys tobynyń alǵashqy onlaın otyrysy 2026 jylǵy sáýirde ótti.
Tájirıbe almasý qorytyndysy boıynsha qatysýshylar TMU elderinde jańa aqparattyq qaýip-qaterlerge qarsy is-qımyldyń bir-birine paıdaly bolýy múmkin praktıkalary qalyptasqanyn atap ótti.
Sonymen qatar qatysýshylar dezınformatsııaǵa qarsy is-qımyl men sóz bostandyǵyna, sondaı-aq azamattardyń quqyqtary men derbes derekterin qorǵaý arasyndaǵy tepe-teńdikti saqtaýdyń mańyzdylyǵyna erekshe nazar aýdardy.
Otyrysqa qatysýshylar Qazaqstanǵa qonaqjaılyǵy men kezdesýdi joǵary deńgeıde uıymdastyrǵany úshin alǵys bildirip, Konsýltatıvtik platformanyń túrki memleketteriniń ortalyq saılaý organdary arasynda turaqty tájirıbe almasý jáne yntymaqtastyqty nyǵaıtý alańy retindegi mańyzyn atap kórsetti.
Olar sondaı-aq platforma aıasyndaǵy ózara is-qımyl kásibı baılanystardy nyǵaıtyp qana qoımaı, TMU-ǵa múshe memleketterdiń tarıhı jáne mádenı dástúrleriniń ortaqtyǵyn kórsetetinine mán berdi.
Konsýltatıvtik platforma qalaı quryldy
Túrki memleketteri uıymyna múshe memleketterdiń ortalyq saılaý organdarynyń Konsýltatıvtik platformasyn qurý týraly bastamany Qazaqstan Respýblıkasynyń Prezıdenti Qasym-Jomart Toqaev 2023 jylǵy 3 qarashada Astanada ótken TMU-nyń X mereıtoılyq sammıti barysynda kóterdi.
Platformany qurý týraly usynysty túrki memleketteriniń basshylary biraýyzdan qoldap, ol 2024 jylǵy 6 qarashada qabyldanǵan TMU XI sammıtiniń Bishkek deklaratsııasynda kórinis tapty.
Konsýltatıvtik platformanyń alǵashqy otyrysy 2025 jylǵy mamyrda Túrkistan qalasynda uıymdastyryldy.
